Sambodan álem chempıony Eset Qýanov dzıýdodan da baq synaýy múmkin

Bul týraly álem chempıony baspasóz máslıhatynda aıtty, dep habarlaıdy QazAqparat tilshisi.

 Aqtóbe úshin Olımpıada chempıonyn daıyndaý basty maqsatqa aınaldy. Reseıdiń Sochı qalasynda ótken álem chempıonatynda Eset Qýanov jeńiske jetip, elge oralǵan soń ol óz josparymen bólisti.

«Aqtóbege kelip, ystyq yqylasqa bólendik. Bul jeńis ońaı bolǵan joq. Biz eńbek etip, ter tóktik. Men bul jeńiske uzaq jyl daıyndaldym. 2013 jyly Qazaqstan quramasyna ótip, halyqaralyq týrnırlerge qatystym. 2014 jyldan bastap QR chempıony boldym. Álem chempıonattaryna qatysyp, osy joly jeńiske jettim. Tájirıbe jınap, altyn medal aldym. Aqtyq synda Reseı sportshysymen kezdesip, uttym. Aslan Mýdranovpen 2014 jyly Londondaǵy álem chempıonatynda kezdesken edim. Ol jarysta jeńilip, bul joly ese qaıtardym»,- dedi sambodan álem chempıony Eset Qýanov.

Aıta keteıik, Sochıde ótken álem chempıonatyna Qazaqstannan 27 sportshy qatysty. Barlyǵy 9 salmaq dárejesi boıynsha álem chempıondary anyqtaly. Al Aqtóbeden 4 sportshy bardy. Úsheýi sambodan, bireýi áskerı sambodan qatysty. Áskerı sambodan qola júlde alǵan Amandyq Asaýuly aldaǵy ýaqytta bar kúshin sportqa arnaıdy.

«Men úlken dodaǵa alǵash ret qatystym. Qatelik jasap, tisimdi syndyryp aldym. Jartylaı fınal kezinde belgııalyq sportshyny jeńip, úshinshi oryndy ıelendim»,- dedi Amandyq Asaýuly. Sambo sheberleriniń jattyqtyrýshysy Aqádil Ýbaevtyń aıtýynsha, álem chempıony Eset Qýanov aldaǵy ýaqytta dzıýdodan jarystarǵa qatysýy múmkin. Sebebi, dzıýdo olımpıada oıyndarynyń qataryna endi.

«Sambo Azııa, Afrıka oıyndaryna kirdi. Eset Qýanov keler jyly Djakartada ótetin Azııa oıyndaryna qatysady dep josparlandy. Sambo da Olımpıada oıyndarynyń qataryna enýi múmkin. Sondyqtan eń durys joldy tańdaımyz»,- dedi Aqádil Ýbaev. Sambo men dzıýdony qatar alyp júrgen sportshy Eset Qýanov Eset batyr Kókiulynyń 325 jyldyǵynda dúnıege keldi. Arada shırek ǵasyr ótkende batyrdyń 350 jyldyǵy toılanyp, Eset Qýanuly jeńiske jetti.