Sambodan álem chempıony Temirlan Kólbaı: Talaı jylǵy tógilgen ter tekke ketken joq

ASTANA. KAZINFORM – Jaqsylyq Úshkempirov atyndaǵy jekpe-jek saraıynda eresekter arasynda sambodan ótip jatqan álem chempıonatynda jeńimpaz atanǵan Temirlan Kólbaı jarystan keıingi áserimen bólisti.

Batysqazaqstandyq balýannyń aıtýynsha, kópten kózdegen bıik belesti baǵyndyrǵan.

«Barlyq qarsylastarym da osal bolǵan joq. Bul eldiń jeńisi dep oılaımyn. Talaı jylǵy tógilgen ter tekke ketpeı, bapkerlerimniń eńbegi aqtaldy. Maǵan janashyr bolǵan adamdardyń bárine myń alǵys. Aldaǵy maqsatym týraly aıtsam, jattyqtyrýshylarymmen aqyldasyp, bir sheshimge kelemin», dedi Kazinform tilshisine Temirlan Kólbaı. 

Sporttyq jolynda alǵash ret álem chempıony atanyp otyrǵan Temirlan Kólbaı 1995 jyly Bórli aýdany ortalyǵy Aqsaı qalasynda dúnıege kelgen. 2013 jyly Oral qalasyndaǵy sportqa daryndy balalarǵa arnalǵan mamandandyrylǵan mektep-ınternatynyń dzıýdo bólimin bitirgen. Mahambet Ótemisuly atyndaǵy Batys Qazaqstan ýnıversıteti dene shynyqtyrý fakýltetiniń 2017 jylǵy túlegi. Úılengen. Otbasynda tórt bala tárbıelep otyr.

T.Kólbaı – dzıýdo kúresinen jasóspirimder arasynda Azııa chempıony, jastar arasynda Azııa chempıonatynyń júldegeri. Dzıýdodan jasóspirimder, jastar, eresekter arasyndaǵy Qazaqstan chempıony. Sambodan eresekter arasynda Azııa chempıonatynyń tórt dúrkin jeńimpazy.

Temirlannyń alǵashqy jattyqtyrýshysy Qasym Qajenov bolsa, jeke bapkeri – Raıbek Meńdiǵalıev.

Elordada ótip jatqan álem chempıonaty 10 qarasha kúni máresine jetedi.

Eske sala keteıik, budan buryn Astanada sambodan álem chempıonaty bastalǵanyn jazǵan edik.

Sondaı-aq Temirlan Kólbaı álem chempıony atandy.