Sambodan álem chempıonatynda Qazaqstan quramasy 3 altyn, 5 kúmis, 9 qola medal jeńip aldy
ASTANA. KAZINFORM – Astanadaǵy Jaqsylyq Úshkempirov atyndaǵy jekpe-jek sport saraıynda sambodan (sporttyq, jaýyngerlik, zaǵıp jandar arasynda) álem chempıonaty máresine jetti.
Qazaqstan sambo federatsııasynyń birinshi vıtse-prezıdenti Manarbek Bısekenovtiń aıtýynsha, el quramasy 3 altyn, 5 kúmis, 9 qola, barlyǵy 17 medal jeńip aldy.
Qazaqstandyq samboshylar álem birinshiliginde alǵash ret birden úsh altyn alyp, tarıhı nátıjege qol jetkizdi.
Jarystyń sońǵy kúni, ásirese, Nurıla Asanqyzy erledi. Jaýyngerlik sambodan 80 keliden joǵary salmaqta kúresken Nurıla murny synsa da, aıaǵyna deıin tózip, túrikmenstandyq Sabına Aǵajanovany utty.
«Endi ǵana eresekter sanatyna aýysyp, álem chempıonatyna qatysyp jatyrmyn. Jekpe-jek barysynda jaraqat alsam da, óz jerimde sońyna deıin shydap baqtym. Barsha jankúıerge alǵysym sheksiz. Bul jeńisimdi ómirden ótken ákeme arnaımyn. Marqum ákem meni eresekter arasynda eń joǵarǵy sanattan kórgisi kelip edi. Mine, sol maqsatym oryndaldy!», - dedi asa aýyr salmaqta chempıon atanǵan Nurıla Asanqyzy.
Altyn medalǵa sporttyq sambodan batysqazaqstandyq Serikbaı Neǵmet jaqyn boldy. Grýzııalyq Elızbar Túrkııamen tartysty jekpe-jek 1:1 esebimen teń aıaqtaldy. Biraq sońǵy upaıdy grýzııalyq alǵandyqtan, jeńis soǵan berildi.
Sonymen qatar Talǵat Jıentaev (jaýyngerlik sambo, +98 keli), Baqytjan Dúısembekov (jaýyngerlik sambo, 79 kg) kúmis medal alsa, Qymbat Ahmet (jaýyngerlik sambo, 50 keli) pen Asqar Qaıyrovqa (zaǵıptar sanaty, 98 keli) qola buıyrdy.
Jaýyngerlik sambodan áıelder saıysy men zaǵıptar arasyndaǵy báseke álem chempıonatyna alǵash ret engizildi.
Qazaqstan quramasy jalpykomandalyq esepte 80 eldiń arasynan ekinshi orynǵa kóterildi.
1-oryn. Beıtarap sportshylar (reseılikter, FIAS-1) - 16 altyn, 5 kúmis, 5 qola,
2-oryn. Qazaqstan - 3 altyn, 5 kúmis, 9 qola,
3-oryn. Beıtarap sportshylar (Belarýs, FIAS-2) - 3 altyn, 2 kúmis, 4 qola.
Buǵan deıin sportshylarymyz jalpy esepte eń joǵarǵy 2-oryndy 2014 jyly Japonııada ótken álem chempıonatynda tirkegen.
«Qazaqstan jerinde ekinshi márte uıymdastyrylǵan álem chempıonatyn abyroımen aıaqtap, jalpy esepte ekinshi oryndy aldyq. Qoldaý tanytqan, oqý-jattyǵý jıynyn ótkizýge kómektesken jandarǵa alǵysym sheksiz. Júıeli túrde daıyndaldyq. Mine, endi sonyń jemisin kórip jatyrmyz. Jeńisti kúnderde jolyqqansha!» - dep aıtty sambodan Ulttyq quramanyń bas bapkeri Birjan Imahanov Sportty damytý dırektsııasynyń baspasóz qyzmetine bergen suhbatynda.
Bıylǵy álem chempıonatyna jahannyń 80 memleketinen 470 sportshy jınalyp, 46 el júldemen qaıtty.
Eske sala keteıik, budan buryn sambodan álem chempıony Temirlan Kólbaıdyń talaı jylǵy tógilgen ter tekke ketpegeni týraly jazǵan edik.
Qazaqstandyq balýandar álem chempıonatynyń 2-kúni 1 altyn, 2 kúmis medal jeńip aldy.
