Sambodan ÁCh: Jarystyń sońǵy kúni Qazaqstan qorjynyna qos kúmis, eki qola medal tústi
NUR-SULTAN. QazAqparat – Sambodan eresekter arasynda Ońtústik Koreıanyń Chhondjý qalasynda márege jetken álem chempıonatynyń sońǵy kúni Qazaqstan qorjynyna qos kúmis, eki qola medal tústi, dep habarlaıdy QazAqparat tilshisi.
Halyqaralyq sambo federatsııasynyń saıtynan alynǵan málimetke qaraǵanda, 10 qarasha kúni toǵyz salmaq dárejesinde medaldar sarapqa salyndy.
Jambyl oblysynyń ókili Dildásh Quryshbaeva 68 kg salmaqta fınalda alty dúrkin álem chempıony, reseılik Marına Mohnatkınaǵa ese jiberip, ekinshi orynǵa kóterildi.
Erler arasynda qaraǵandylyq Rahat Jańanıet 62 kg salmaqta qola júldege ıe boldy.
Jaýyngerlik sambodan mańǵystaýlyq Nurken Dombaev 52 kg salmaqta sońǵy básekede reseılik Rodıon Askanakovqa jol berip, kúmis júldege ıe boldy. 68 kg salmaqta jambyldyq Erlan Mahmýtov taǵy bir qola júldege qol jetkizdi.
Komandalyq esepte jaýyngerlik sambodan Qazaqstan quramasy Reseı men Ýkraınadan keıin úzdik úshtikti túıindedi.
Osylaısha ótken jyly dúnıejúzilik dodada qos altyn alǵan qazaqstandyq samboshylar bıylǵy álem chempıonatynda 4 kúmis, 5 qola júldege ıe boldy.
Eske sala keteıik, budan buryn jarystyń ekinshi kúni qazaqstandyqtar eki qola júlde alǵanyn jazǵan bolatynbyz.
