Sambo: Qazaqstan quramasy álem birinshiliginen júldeli oraldy
TALDYQORǴAN. QazAqparat - Sambo kúresinen Qazaqstan quramasy álem birinshiliginen júldemen qaıtty. Bul týraly «Jetisu Media» alańynda ótken baspasóz-máslıhaty barysynda belgili boldy, dep habarlaıdy QazAqparat tilshisi.
Ońtústik Koreıa memleketi Chhonjý qalasynda ótken jarysta el qorjynyna 4 kúmis, 5 qola medal tústi. Jalpy, jarysqa 81 memleketten 516 sportshy qatysqan. Bul tizimde Almaty oblysynyń balýandary da bar. Olar Gúlnur Erbolova, Dınara Jumabaeva, Dildash Quryshbaeva, Arnur Qýataı, Bolatbek Jumagereev.
Máselen, Dildash Quryshbaeva fınalǵa deıin qarsylastaryn aıqyn basymdyqpen jeńip, sheshýshi synda Reseı sportshysyna ǵana jol berdi. Osylaısha jerlesimiz kúmis júldeni jeńip aldy. Bul onyń jahandyq jarystan alǵan besinshi júldesi.
Dınara Jumabaeva da el namysyn laıyqty qorǵaı bildi. Ol úshinshi orynnan kórindi.
Jergilikti jýrnalıstermen kezdesken el quramasynyń músheleri jarystan alǵan áserlerimen bólisip, aldaǵy josparlaryn aıtty. Sportshylardyń endigi maqsaty — jeltoqsan aıynda Nur-Sultan qalasynda ótetin álem kýbogynyń kezeńinde top jarý.
Sonymen qatar, sportshylar keler jyly Túrikmenstan astanasy Ashhabadta jalaýyn jelbiretetin dúnıejúzilik básekede birinshi oryndy alýdy kózdep otyr.
