Sambo: Harlampıev týrnırinde qazaqstandyqtar júldesiz qalǵan joq
ASTANA. QazAqparat - Máskeý qalasynda sambodan dástúrli «A.Harlampıev memorıaly» álem kýbogy márege jetti, dep habarlaıdy «QazAqparat» HAA tilshisi.
Halyqaralyq sambo federatsııasynyń resmı saıtynan alynǵan málimetke qaraǵanda, álemniń jıyrmadan astam elinen eń myqty samboshylar qatysqan halyqaralyq dodada qazaqstandyqtar da júldesiz qalǵan joq. Atap aıtqanda, jarystyń birinshi kúni áıelder arasynda Gúlnur Erbolova 52 kg, Ajar Keńbeıil 60 kg, Araılym Shegenova 80 kg, erlerden Nurbol Serikov 68 kg, áskerı sambodan Mırjan Baqtybaev 82 kg salmaqta qola júldeger atandy.
Al senbi kúni erler arasynda Beıimbet Qanjanov 52 kg, Erasyl Qajybaev +100 kg salmaqta kúmis júldege qol jetkizdi. Sondaı-aq áıelder arasynda Dınara Jumabaeva 64 kg, áskerı sambodan Shyńǵys Qajıaqparov 62 kg salmaqta qola medaldi ıelendi.
Komandalyq esepte áıelder arasynda Reseı, Grýzııa, Belarýs, erlerden Reseı, Belarýs, Túrkmenstan, áskerı sambodan Reseı, Túrkmenstan, Armenııa elderi alda boldy. Ókinishke qaraı, Qazaqstan quramasy úzdik úshtikke ilige alǵan joq.
Aıta keteıik, 7-9 sáýir kúnderi Almaty qalasynda erler men áıelder arasynda sambodan Qazaqstan Prezıdenti Nursultan Nazarbaevtyń júldesi úshin halyqaralyq týrnır ótetin bolady.
