Sambo: Eset Qýanov «Harlampıev memorıaly» týrnıriniń jeńimpazy atandy
ASTANA. QazAqparat - Máskeý qalasynda 25-26 naýryz kúnderi sambodan ótken «Harlampıev memorıaly» álem kýbogy saıysynda qazaqstandyq balýandar da júldeden qur qalǵan joq.
Halyqaralyq sambo federatsııasynyń saıtynan alynǵan málimetke qaraǵanda, álemniń kóptegen elderinen maıtalman balýandar qatysqan jarystyń birinshi kúni áıelder arasynda Gúlnár Erbolova 52 kg salmaqta fınalda reseılik Anna Harıtonovadan taza jeńilip, kúmis júldeger atandy. Sondaı-aq Aqtolqyn Smaǵanbetova 80 kg salmaqta sońǵy básekede taǵy da reseılik Anastasııa Fılıppovıchke ese jiberip, ekinshi oryndy ıelendi. Al Ajar Keńpeıil 60 kg, erler arasynda Shyńǵys Shoqpytov 100 kg salmaqta qola medaldi jeńip aldy. Oǵan qosa áskerı sambodan Erjan Qabdelov 82 kelide kúmis medaldi oljalady.
Jarystyń ekinshi kúni Qazaqstan qorjynyna altyn medal da tústi. Eset Qýanov 62 keli salmaqta jeńis tuǵyryna kóterildi. Sonymen qatar Dınara Jumabaeva 64 kg, Dildásh Kúrishbaeva 72 kg jáne Qundyzaı Jaıshybekova 80 kg joǵary salmaqta fınalda ǵana súrinip, kúmis júldeni ıelendi. Erler arasynda Beıimbet Qanjanov 52 kg, Aıdyn Dartaev 74 kg, áskerı sambodan Amangeldi Amanshaev 52 kg jáne Rýslan Aýshev 100 kg joǵary salmaqta qola júldeni qanaǵat tutty.
