Sambo: A.Súleımenov pen A.Ospanov áskerı sambodan álem chempıony atandy
ASTANA. QazAqparat - Búgin Japonııanyń Narıta qalasynda sambodan eresekter arasynda álem chempıonaty márege jetti.
Halyqaralyq sambo federatsııasynyń saıtynan alynǵan málimetke qaraǵanda, jarystyń sońǵy kúni de toǵyz salmaq dárejesi boıynsha medaldar sarapqa salyndy. Qazaqstandyq Dildásh Quryshbaeva 68 keli salmaqta fınalda ýkraınalyq Lýıza Gaınýtdınovaǵa ǵana ese jiberip, kúmis júldeger atandy. Erlerden 62 keli salmaqta Eset Qýanov, 100 keliden joǵary salmaqta batysqazaqstandyq belgili balýan, «Qazaqstan barysyna» da qatysyp júrgen Edil Úsenov qola júldeni ıelendi. Esesine áskerı sambodan Qazaqstan qorjynyna qos altyn medal tústi. Almas Súleımenov 52 keli salmaqta fınalda reseılik Amyr Bakrasovty utyp, jeńimpaz atandy. Al Arman Ospanov 68 kelide sońǵy básekede túrkmenstandyq Nııazmurat Shahmuradovty jeńip, chempıondyqqa qol jetkizdi.
Aıta keteıik, bul álem chempıonatynda sporttyq sambodan Qazaqstan ulttyq quramasy aıtarlyqtaı óner kórsete alǵan joq. Gaýhar Turmahanova ǵana 52 keli salmaqta altynnan alqa taǵyndy. Jigitterimizge ondaı bıik baǵynbady bul joly. Sol sebepti áıelder men erler arasynda Qazaqstan quramasy jalpy esepte alǵashqy úshtikke ilige alǵan joq. Tek áskerı sambodan ǵana qazaqstandyqtar jalpykomandalyq esepte Reseı men Bolgarııadan keıingi úshinshi oryndy ıelendi.
