Samatáli Tóltaev kásipqoı boksta kedergisiz judyryqtasa alady — menedjeri
ASTANA. KAZINFORM — Dopıng daýyna iligip, sporttan shettetilgen ulttyq quramanyń burynǵy múshesi Samatáli Tóltaevtiń menedjeri Janpeıis Nazarǵalı boksshynyń kásipqoı boksqa aýysýyna eshqandaı kedergi joq ekenin aıtady.
Bul týraly ol KAZINFORM tilshisiniń saýalyna bergen jaýabynda atap ótti.
«Samatáli Tóltaevtyń jaqynda kásipqoı boksta óner kórsetetinin aıta ketkim keledi. Ózderińizge belgili, Samatáli byltyr synamasynan dopıng tabylyp, 2023 jylǵy qańtar aıynan bastap úsh jylǵa áýesqoı sporttan shettetilgen bolatyn. Mine, bir jyl ýaqyt ótken soń kásipqoı boksqa ótip jatqan jaıy bar. Kásipqoı boksqa ótý úshin dopıng tabylǵan kezden bastap kem degende 6 aı ýaqyt ótken soń taǵy da analız tapsyrýy tıis bolatyn. S. Tóltaev qarasha aıynda dopıngke analız tapsyryp, synamasy taza bop shyqty. Sodan bastap jattyǵýǵa qaıta kiristik. Buıyrsa 18 aqpan kúni Túrkııanyń Ystanbul qalasynda jergilikti boksshyǵa qarsy debıýttik kezdesý ótkizemiz», — dedi ol.
Sondaı-aq, ol osyǵan deıin de boks tarıhynda synamasynan dopıng tabylyp, sporttan shettetilgen birneshe tanymal boksshynyń alty aı ótken soń kásipqoı boksta óner kórsetkenine mysal da keltirip ótti.
«Samatáli kásipqoı boksqa ótý úshin búkil erejelerdi saqtaǵanyn basa aıtqym keledi. Bir jyl kútti, synamasy taza shyqty. Endi esh kedergi bolmaýy tıis. Mysal retinde Mısha Aloıan, Bektemir Melıkýzıev sekildi sportshylardy atap ótsem jetkilikti bolar», — dedi ol.
Aıta keteıik, jaqynda BoxRec.com saıty 18 aqpanda Ystanbulda (Túrkııa) ótetin boks keshinde Samatáli Tóltaev sharshy alańda jergilikti boksshy Refık Tarhanmen (3-3, 1 KO) judyryqtasatynyn habarlaǵan bolatyn.
Jartylaı orta salmaqtaǵy jekpe-jek tórt raýndqa josparlanǵan.
Aıta keteıik, Samatáli Tóltaev — Qazaqstan quramasynyń burynǵy múshesi.
60 keli salmaqta el namysyn qorǵaǵan bolatyn. Jastar arasynda bokstan álem chempıonatynyń fınalısi, Azııa chempıony (2017), Qazaqstan chempıony (2020), 2022 jylǵy Azııa chempıonatynyń qola júldegeri atanǵan.
Ókinishke qaraı 2023 jyldyń 8 naýryzynda dopıngke qarsy ulttyq ortalyq jarystan tys taldama qorytyndysynda qan quramynan oraltýrınabol tabylyp, 2026 jyldyń 31 naýryzyna deıin ulttyq qurama sapynda jarysqa qatysý quqyǵynan aıyrylǵan bolatyn.
