Samat Smaqov tok soǵyp, eki qolynan aıyrylǵan oqýshymen kezdesti
AQTÓBE. QazAqparat - Aqtóbelik oqýshyny tok soǵyp, eki qolynan aıyrylǵan bolatyn. Búgin ataqty fýtbolshy Samat Smaqov pen Aleksandr Geınrıh oqýshymen kezdesti, dep habarlaıdy QazAqparat tilshisi.
Aqtóbelik oqýshy Damır qazir basyn kóterip, óz betinshe júre alady. Kóńili alań oqýshyǵa búgin ataqty fýtbolshy, «Aqtóbe» FK bas dırektory Samat Smaqov pen oıynshy Aleksandr Geınrıh baryp, arnaıy fýtbolka men dopty syıǵa tartty.
«Ulym Damır fýtbol oınaǵandy jaqsy kóredi. Buǵan deıin ataqty fýtbolshy Samat Smaqovty kórgen emes. Kezdesýden soń Damır dep esimi jazylǵan fýtbolkany, qoltańbasy bar dopty syıǵa aldy. Samat Smaqov óziniń planshetin de berdi. Qazir balam psıhologtardyń baqylaýyna alyndy. Kóńili bólinip, júzine kúlki de úıirildi. Men eshkimniń esigin qaǵyp, kómek suramaımyn. Biraq áleýmettik jeli arqyly bilip, habarlasqan adamdar qamqorlyǵyn aıap jatqan joq. Biri tamaǵyn tasysa, biri dárýmenge baı jemis-jıdek jetkizdi. Qolyndaǵy aqshasyn berip jatqandar da bar. Bári úshin alǵys aıtamyz»,- deıdi Damırdyń anasy Gúlmıra Faktýlına. Qazir Damır ekinshi otaǵa daıyndalyp jatyr. Dárigerler oqýshynyń kúıik shalǵan denesin qalpyna keltiredi.
Eske salsaq, Aqtóbe qalasy, Shalqar aýdanynda oqys oqıǵa tirkelip, 4-synyp oqýshysy eki qolynan aıyrylǵan edi.
Qýaty 10 myń Volt bolatyn elektr transformatoryna kirip ketip, jarymjan bolyp qalǵan balaǵa psıhologtar kómek kórsetip jatyr.
