Samat Smaqov sý tasqyny kezinde zardap shekken aqtóbelikterge kómektesti

AQTÓBE. QazAqparat - Aqtóbege erekshe yqylaspen qaraıtyn fýtbolshy Samat Smaqov sý tasqyny kezinde zardap shekkenderge kómektesti, dep habarlaıdy QazAqparat tilshisi.

Aqtóbedegi sý tasqyny kezinde birneshe esepshot ashylyp, ákimdik pen úkimettik emes uıymdar áleýmettik kómek komıssııasyn qurdy. Óńirdegi «Nur Ǵasyr» meshiti tasqyn sý kezinde zardap shekken otbasyǵa kómektesemin degen adamdardyń qarjysy men zattaryn qabyldaı bastady. 

«Aqtóbedegi jaǵdaıdy estip sý tasqyny kezinde zardap shekken balalar úshin qarjy aýdardym. Aqshany eriktiler arqyly jetkizdim»,- dedi «Ordabasy» fýtbol klýbynyń kapıtany Samat Smaqov. Keıin fýtbolshynyń qaıyrymdylyq isin «Aqtóbe» fýtbol klýby jalǵastyrdy. Olar №40, 26 mektepterge qajetti zattardy aparyp berdi.

«Aqtóbe» fýtbol klýbynyń oıynshylary Samat Smaqovtyń izimen sý tasqyny kezinde zardap shekken adamdarǵa kómektesti. Mektepterdi panalaǵan adamdarǵa qajetti zattardyń bári jetkizildi», - dep habarlady klýbtyń baspasóz hatshysy.

Aıta keteıik, Aqtóbe oblysynda bir táýlikte 400-ge jýyq adam kóshirildi. Kóbi týystarynyń úıin panalady. Qarǵaly ózeninde sý tasyp, Sadovyı aýylyndaǵy 47 úı pen aýlany basty. Sońǵy málimetke súıensek, sý tasqyny bastalǵan kúnnen bastap barlyǵy 2 myńǵa jýyq adam qaýipsiz jerge kóshirilgen.