Samat Smaqov fýtboldaǵy mansabyn aıaqtady
ASTANA. QazAqparat - Qazaqstandyq fýtboldyń ardageri Samat Smaqov el quramasy úshin Rýmynııaǵa qarsy matchta sońǵy ret oınady, dep habarlaıdy QazAqparat.
2018 jylǵy Álem chempıonatyna irikteý týrnırinde Rýmynııamen teń túsken oıynnan keıin sportshylar kıim aýystyrý bólmesinde Smaqovty shyǵaryp salý rásimin jasady. Fýtbolshyny aspanǵa laqtyrǵan vıdeony pavlodarlyq «Ertis» qaqpashysy Davıd Lorııa óz paraqshasynda jarııalady.
«Bul meniń ulttyq qurama sapyndaǵy sońǵy oıynym. Bul sheshimdi qabyldaý ońaıǵa soqqan joq. Men uzaq oılandym. Jastarǵa jol berý kerek. Meniń sońǵy oıynyma kelgen jankúıerlerge alǵysym sheksiz. Fýtbolshynyń mansabyn aıaqtaǵanymmen, ulttyq quramadan ketpeımin. Bapker retinde eńbek etýim múmkin», - dedi Samat Smaqov «Qazaqstan» arnasyndaǵy tikeleı translıatsııa barysynda.
Aıta keteıik, 37 jastaǵy jartylaı qorǵaýshy Qurama sapynda 2000 jyldan beri oınady jáne rekordty 75 matchqa qatysty.
Qazirgi oıynshylardan Smaqovty myna sportshylar qýyp jetýi múmkin - Nurbol Jumasqalıev (55 oıyn), Davıd Lorııa (40 match) jáne Sergeı Hıjnıchenko (39 oıyn).
