Samat Smaqov «Astana» komandasynyń tehnıkalyq dırektory qyzmetine taǵaıyndaldy

Qazaqstandyq tanymal burynǵy fýtbolshy jáne tájirıbeli maman Samat Smaqov elordalyq «Astana» komandasynyń tehnıkalyq dırektory qyzmetine taǵaıyndaldy, dep habarlaıdy Kazinform. 

Samat Smaqov fýtbolshy retinde joǵary jetistikterge qol jetkizgen. Qazaqstan, Reseı jáne Túrkııa klýbtarynda dop tepti.

Sporttyq mansabyn aıaqtaǵannan keıin «Aqtóbe» fýtbol klýbynda bas dırektor qyzmetin atqardy. Bıyl «Elimaı» komandasynyń bas bapkeri retinde klýbty Premer-lıgaǵa shyǵardy.

«Klýb basshylyǵy Samat Qabırulynyń fýtbol salasyndaǵy kásibı mol tájirıbesiniń arqasynda aldaǵy ýaqytta «Astana» fýtbol klýbynyń tehnıkalyq baǵyttaǵy jumystary tek oń sheshimin taýyp, damı túsedi dep senim bildiredi. Tehnıkalyq dırektordyń mindetine sport bóliminiń qyzmetin tehnıkalyq turǵyda qamtamasyz etý, onyń ishinde fýtbol akademııasynyń qurylysy men tabysty jumys isteýi jatady», - dep jazylǵan «Astana» klýby taratqan habarlamada.

Al budan buryn Andreı Karpovıch «Elimaıdyń» bas bapkeri qyzmetine kirisken bolatyn.