Samat Smaqov «Aqtóbe» fýtbol klýbynyń jaǵdaıy múshkil ekenin málimdedi
AQTÓBE. QazAqparat - «Aqtóbe» FK bas dırekory Samat Smaqov resmı málimdeme jasady. FIFA aldaǵy ýaqytta jańa oıynshylar alýǵa tyıym salyp, taǵy 6 upaıdy shegerýi múmkin, dep habarlaıdy QazAqparat tilshisi fýtbol klýbynyń baspasóz qyzmetine silteme jasap.
«Búgin «Aqtóbe» FK burynǵy oıynshylaryna qaryzdy ýaqytyly qaıtarmaǵany jáne bul kemshiliktiń júıeli qaıtalanǵany úshin jaza qoldanylatyny týraly hat keldi. Fýtbol klýbyna kezekti sanktsııa berildi. Aldaǵy ýaqytta biz jańa oıynshylardy ala almaımyz. Ókinishke qaraı, klýbtyń ótken jyldardaǵy qaryzy tez ósip jatyr. Burynǵy oıynshylardyń aryzy da kún ótken saıyn artyp otyr. Eger taıaýda biz qaryzdy túgel qaıtarmasaq, taǵy 6 upaıdy alyp tastaıdy.
Bárin búkpeımiz, klýbtyń jaǵdaıy múshkil ekenin jetkizip otyrmyz. Qazirgi oıynshylar da alańdap, ózge klýbqa aýysýǵa ruqsat berýimdi surady. Olardyń arasynda qazaqstandyq, sheteldik klýbtardan shaqyrý alǵan oıynshylarymyz bar. Eger jaqyn arada jaǵdaı ońalmasa men legıonerlerdiń bárin bosatyp, tek jergilikti jerde tárbıelengen fýtbolshylarmen oıyndy jalǵastyrýǵa sheshim qabyldaımyn. Taǵy 6 upaıdy alyp, barlyǵy 12 upaı shegerilse, biz Qazaqstan Premer-lıgasynan shyǵyp qalamyz.
Eger meni jumystan shyǵaryp jibermese men jattyqtyrýshylar jáne ákimshilik sol kúıi ornymyzda qalamyz. Klýb lıtsenzııasynan aıyrylyp, Qazaqstan chempıonatynan shettetilýimiz eń qorqynyshtysy bolyp tur. Sonda tarıhy baı, jeńisti klýb óz jumysyn toqtatady. Biraq bul jaǵdaıǵa jetkizýge bolmaıdy. Óńir basshysy demeýshi izdep jatqany týraly aıtty. Oǵan ýaqyt tym az»,- dep óz oıyn bildirgen «Aqtóbe» FK bas dırekory Samat Smaqov.
Aıta keteıik, «Aqtóbe» FK basshylyǵy men oblys ákiminiń orynbasary Erbol Nurǵalıev bir apta buryn ǵana baspasóz máslıhatyn ótkizip, klýbtyń qarjylyq jaǵdaıy baqylaýda ekenin aıtqan bolatyn. Biraq FIFA óz sheshimin shyǵardy.
