Samat Smaqov: «Aqtóbe» fýtbol klýby FIFA alǵan 6 upaıdy keıin qaıtarady
AQTÓBE. QazAqparat - «Aqtóbe» fýtbol klýbynan aqshasyn ala almaı júrgen oıynshylar sotqa berýdi jalǵastyryp jatyr. Soǵan qaramastan Samat Smaqov FIFA alǵan 6 upaıdy keıin qaıtarý jolynda jumys isteıdi, dep habarlaıdy QazAqparat tilshisi.
«Aqtóbe» fýtbol komandasy kesteniń sońynda turǵanymen jankúıerlerdiń saǵyn eshkim syndyra alǵan joq. Bas dırektor Samat Smaqov jyl basynan beri oıynshylar men jattyqtyrýshylar aldyndaǵy qaryzdyń bir bóligi ótelgenin aıtyp berdi.
«Ókinishke qaraı «Aqtóbe» FK 12 komandanyń sońynda kele jatyr. Soǵan qaramastan fýtbolshylar men jattyqtyrýshylarǵa alǵys aıtamyn. Fýtbolshylar óte jınaqy, shıraq. Qazir komandada «Aqtóbe» úshin jany ashıtyn, alańda bar kúshin salatyn oıynshylar júr. 2018 jyly utqyr marketıngtiń arqasynda FIFA-nyń qaraýynda bolǵan 9 is jabyldy. Bul sheshim arqyly sanktsııa tyǵyryǵynan shyǵyp kettik. Olar: Sandro Tsveıba, Mıhaıl Petrolaı, Egor Sorokın, eks-bas jattyqtyrýshy ıÝrıı Ýtkýlbaev, Konstantın Demenko, Oleg Nechaev, Sergeı Kozko, Shreıbl, Vıtor Jýnıor. Marketıng, jankúıerlerdiń arqasynda osy másele sheshildi. Áli de birneshe is bar. Bárimen baılanystamyn, kútýdi surap otyrmyn. Keıbiri túsinedi, keıbiriniń shydamy taýsylyp, FIFA-ǵa shaǵymdandy. Al Nemanıa Nıkolıchke keler bolsaq, 5 kún buryn sóılestim. Ózimen kezdesý kerek bolyp tur. Sebebi, 200 mıllıon teńgeni tóleý múmkin emes»,- dedi «Aqtóbe» FK bas dırektory Samat Smaqov.
«Aqtóbeniń» turaqty oıynyn Qazaqstannyń bas jattyqtyrýshysy Stanımer Stoılov ta baǵalady. Tipti, 2-3 oıynshyǵa Qazaqstan klýbtary ǵana emes, sheteldik klýbtar qyzyǵýshylyq tanytty.
«Men, bas jattyqtyrýshy Vladımır Mýhanov qoldan kelgenniń bárin jasaımyz. 2018 jyldyń qarjysy bólindi, eshqandaı qaryz bolmaıdy. 2014-2017 jyldar arasyndaǵy boryshy máselesi jospar boıynsha sheshiledi. «Aqtóbeniń» eks-oıynshysy Danılo Nekoǵa qatysty da is qaralyp jatyr. Sheshimi shyqqan soń biz 6 upaıdy keri qaıtara alamyz», - dedi Samat Smaqov.
Danılo Nekonyń qaryzy tólense, «Aqtóbe» FK bıyl óz oıynshylaryna eńbekaqy tóleı almaıtyn edi. Sondyqtan sot sheshimi shyqqansha 6 upaıdy berýge kelisken.
«Aqtóbe» fýtbol klýbyna qarjy bólý azaıyp otyrǵan joq. Tek burynnan jınalǵan qaryz bar. Sot protsesi júrip jatqan soń qaryzdyń naqty mólsherin aıta almaımyz. Fýtbolshylarmen kelisimshart dollarmen júrgizilgen. Al bul Qazaqstan zańnamasyna qaıshy. Oblys ákimdigi «Aqtóbeni» Premer-lıgadan alyp tastaýǵa jol bermeıdi. Sebebi, jankúıerler úshin klýbtyń erekshe orny bar ekenin bilemiz», - dedi Aqtóbe oblysy ákiminiń orynbasary Erbol Nurǵalıev.
Aıta keteıik, oblys ákimdigi qaryzdy óteý kezinde bıýdjetten tys qarjy izdeýge kóshken.
