Samat Smaqov 40 jyl «Aqtóbeniń» jankúıeri bolǵan qarııaǵa abonement syılady
AQTÓBE. QazAqparat - «Aqtóbe» fýtbol klýbynyń bas dırektory Samat Smaqov 80 jastaǵy Lıdııa Djýrınskaıaǵa jyldyq abonement tapsyrdy. Qarııa 40 jyl boıy aqtóbelik fýtbol komandasynyń jankúıeri bolyp júr, dep habarlaıdy QazAqparat tilshisi.
«Aqtóbe» fýtbol klýbynyń qıyn jaǵdaıyna qaramastan karerasyn aıaqtap, basshylyqqa kelgen Samat Smaqov birneshe batyl qadamǵa bardy. Óz atyn paıdalanyp, aılyǵyn ala almaı júrgen fýtbolshyǵa ótinish te jasady. Buǵan deıin habarlaǵanymyzdaı, klýbtyń bankrottyq jaǵdaıyn ashyq aıtyp, qaryzdardy tizbektegen bolatyn.
Sonymen qatar, ol fýtbolǵa shyn jany ashyp, uzaq jyl boıy jankúıer bolyp júrgendermen kezdesti. 80 jastaǵy Lıdııa Djýrınskaıa jas kezinen bastap aqtóbelik fýtbol klýbyna jankúıer bolyp júr. Ol 40 jyl boıy fýtbol kórip, ortalyq stadıonda bolatyn oıynǵa jıi barady.
«Lıdııa Djýrınskaıanyń súıikti oıynshysy -Samat Smaqov. Sondyqtan klýbtyń bas dırektory ardager jankúıermen jeke kezdesýdi jón kórdi. Kezdesý kezinde qarııa fýtbol komandasy úshin alańdaǵanyn, al Samat Smaqov kelgen soń kóńili jaılanǵanyn jetkizdi. Sonymen qatar, «Aqtóbe» fýtbol klýby tek oıyn alańy emes, Samat Smaqovtyń ekinshi úıi ekenin basa aıtty»,- dep habarlady fýtbol klýbynyń baspasóz qyzmeti.
Aıta keteıik, ardager jankúıerge maýsymdyq abonement tapsyryldy. Bas dırektor men jankúıer komandanyń jaqsy kórsetkishteri týraly áńgime qurdy.
