Samat Sársenuly djıý djıtsýdan álem chempıony atandy
ASTANA. QazAqparat - Qazaqstandyq djıý djıtsý sheberleri Birikken Arab Ámirlikteriniń astanasy Ábý Dabı qalasynda ótip jatqan álem chempıonatynda jeńimpaz atandy, dep habarlaıdy QazAqparat.
Qazaqstandyq djıý djıtsý federatsııasynyń málimetinshe, 56 keli salmaqta qarsylasyn qapy qaldyrǵan Samat Sársenuly altyn medal jeńip alyp, álem chempıony bolǵan.
Sondaı-aq búgin aqmolalyq Bekzat Baımuratov eresekter arasynda álem chempıonatynda qola júldeger atandy.
Ol 77 keli salmaq dárejesinde faıtıng bóliminde óner kórsetken.
Aıta keteıik, búgin - álem chempıonatynyń altynshy kúni. Qazaqstan quramasy ázirge birinshi orynda tur.
Búgin erler arasynda -56, -77, +94 keli salmaq dárejesi boıynsha jekpe-jek ótti.
Al keshe jarystyń besinshi kúni qazaqstandyq Rýslan Israılov - altyn, Nurjan Batyrbekov pen Darhan Nortaev - qola medalge qol jetkizgen bolatyn.
