Samat Nurtaza: Qazaqstan men Qytaı basshylary bir-birine óte jaqyn ekenin kórsetti
Búgin Qytaı Tóraǵasy Sı Tszınpın elimizge memlekettik saparmen keldi. Qazaqstan Prezıdenti Qasym-Jomart Toqaev kórshi el basshysyn erekshe qurmetpen qarsy alǵany málim. Bul sapardyń aldynda eki memlekettiń kóshbasshysy buqaralyq aqparat quraldaryna jyly lebizge toly suhbat berip, maqala jarııalaǵan edi. Bunyń astarynda qandaı mán jatqanyn Májilis depýtaty, saıasattanýshy Samat Nurtaza Kazinform tilshisine aıtyp berdi.
– Qytaı Tóraǵasy Sı Tszınpın Qazaqstanǵa besinshi ret kelip otyr. Qos memleket basshylary bir-birine óte jaqyn, tyǵyz baılanysta, erekshe iltıpat kórsetip júretinin kórsetti. Ony Memleket basshysy Qasym-Jomart Toqaevtyń «Jenmın Jıbao» tilshisine bergen suhbatynan baıqadyq. Budan keıingi kezekte eki tarap ekonomıkalyq, saýda-sattyq, logıstıka máselelerin talqylaýǵa yntaly ekeni ańǵaryldy. Qytaı Tóraǵasy sapar aldyndaǵy maqalasynda «Bir beldeý jáne bir jol» bastamasy men tasymaldaý jaıyna arnaıy toqtalǵan eken. Mysaly, qazir Tynyq muhıtta, buǵazdarda qytaılyq kemeler kóptegen problemalarǵa tap bolýda. Sondyqtan shyǵystaǵy kórshimiz Eýropamen baılanystyryp jatqan Qazaqstan arqyly taýar jetkizýge múddeli. Bul Qazaqstan úshin de paıdaly bolmaq, tranzıttik joldar arqyly elimiz bıýdjetine túsetin tabysty molaıta alady. ıAǵnı, eki tarap qazaq-qytaı jaıyn tolyq qamtyp sóılespek, – dep atap ótti ol.
Sondaı-aq Samat Nurtaza Astanada ótkeli jatqan Shanhaı yntymaqtastyq uıymy sammıtiniń jahandyq saıasattaǵy mańyzy zor bolatynyn jetkizdi. Sheshimin tappaı kele jatqan kóptegen túıtkilder aıtylyp, erekshe kelisimder bolýy múmkin.
– ShYU-nyń qazir bedeli artyp jatyr. Uıymnyń saıası salmaq alǵanyn basqa elder de túsinip, múshe bolýdy oılastyrýda. Sammıtke álemdegi yqpaldy elderdiń basshylary qatysaıyn dep otyrǵan soń kóp nárse kútemiz, geosaıası máseleler de sheshimin taýyp, elimiz halyqaralyq arenada abyroıly ekenin kórsetýi múmkin, – dep túıindedi Májilis depýtaty.
Buǵan deıin Qazaqstan Prezıdenti Qasym-Jomart Toqaev Qytaı Halyq Respýblıkasynyń tóraǵasy Sı Tszınpınniń Qazaqstanǵa sapary qarsańynda Sınhýa agenttigine suhbat bergenin habarlaǵan edik.
Sonymen qatar Memleket basshysy Qasym-Jomart Toqaev «Jenmın Jıbao» tilshisine de suhbat berdi.
Óz kezeginde Qytaı Halyq Respýblıkasynyń Tóraǵasy Sı Tszınpın memlekettik sapar aldynda Qazaqstannyń buqaralyq aqparat quraldaryna arnap jazǵan avtorlyq maqalasyn jarııalady.
