Samat Bashenov «Astana Arlans» komandasynyń kapıtany bolyp saılandy
ALMATY. 24 qazan. QazAqparat - Búgin «Astana Arlans» klýbynyń jatttyǵý bazasynda jańa kapıtannyń esimi belgili boldy.
Búkilálemdik boks serııasynda el namysyn qorǵaıtyn «astanalyqtar» arasynda Qanat Іslámniń kásipqoı boksqa aýysýyna oraı jabyq daýys berý arqyly jańa kapıtandy saılaý rásimi ótken bolatyn. «Astana sport» basylymy taratqan habarlamaǵa qaraǵanda, bylǵary qolǵap sheberleriniń kópshilik daýysymen Samat Bashenov komanda kapıtany bolyp saılandy. Ol sondaı-aq, quramyna Erjan Músápirov, Sergeı Derevıanchenko, Roman Kapıtonenko men Ramjon Ahmedov engen jańadan qurylǵan Sportshylar keńesiniń múshesi bolyp otyr.
Sport sheberi Samat Bashenov 1988 jyly 18 qańtarda týylǵan. Eń tájirıbeli boksshylardyń biri sanalatyn ol 2010 jyl QR Prezıdenti kýbogynyń ıegeri, al 2011 jyl el chempıony atandy. «Astana Arlans» klýbynyń quramyna ótken maýsymda múshe bolyp kirgen Samat Búkilálemdik boks serııasynda 61 keli salmaqta 2 kezdesý ótkizdi. Aldymen «Venky's Mumbai Fighters» klýbynan Charlı Sýaresti jeńip, biraq «Mexico City Guererros» klýbynyń legıoneri Hýrshıd Tojıbaevqa ese jiberdi.
