Samat Ábishke shartty jaza kesilýi zańdy ma – Joǵarǵy sot jaýap berdi
ASTANA. KAZINFORM – Joǵarǵy Sot Qylmystyq ister jónindegi sot alqasynyń tóraǵasy Nazgúl Rahmetýllına suhbatynda Qańtar oqıǵasyna baılanysty aıyptalǵan Ulttyq qaýipsizdik komıteti tóraǵasynyń burynǵy birinshi orynbasary Samat Ábishtiń 8 jyl shartty jazaǵa kesilýine baılanysty túsinikteme berdi.
Parlament palatalarynyń birlesken otyrysynan keıin BAQ ókilderi Joǵarǵy sot ókilinen Samat Ábishke taǵaıyndalǵan jaza qanshalyqty zańdy ekenin surady.
«Qylmystyq kodekstiń 63-babynda shartty sottaý jazasy qoldanylmaıtyn qylmystar tizbesi bar. Bul jemqorlyq qylmystar jáne taǵy basqa birneshe qylmys túri bar. Al, shartty shartty sottaý jazasyn qoldanýǵa negiz bar ma, joq pa degendi ondaı sharaǵa tyıym bolmaǵan jaǵdaıda ár naqty jaǵdaı boıynsha sot sheshedi», - dedi ol.
«Al qyzmettik ókiletin asyra paıdalanýdyń arty eldegi osyndaı qırandyǵa alyp kelgen áreket úshin 8 jyl shartty jaza kesý tompaqtaý emes pe?» - dep surady BAQ ókili.
Nazgúl Rahmetýllınanyń aıtýynsha, jazanyń mundaı túri elimizde aıtarlyqtaı jıi qoldanylady.
«Shartty jaza is júzinde jıi qoldanylady. Óıtkeni zańnyń arnaıy baby bar ǵoı. Sottyń ol jazany qoldanbaýǵa quqyǵy joq. Taǵy qaıtalap aıtamyn, shartty jaza qoldanylmaıtyn qylmystardyń tizbesi bar. Ol – asa aýyr qylmystar, 12 jyldan joǵary bas bostandyǵynan aıyrý jazasy qarastyrylǵan qylmystar, jemqorlyq qylmystar jáne taǵy basqalar. Ondaı tyıym bolmasa, sot ár jaǵdaıdyń mánine qaraı sheshim qabyldaıdy. ıAǵnı, adam buryn sottalǵan ba, minezdemesi qandaı, qylmysymen keltirgen shyǵyndy ótedi me degen sııaqty suraqtar eskeriledi» - dedi Joǵarǵy sot ókili.
