Samat Ábish bostandyqta, biraq eshqaıda ketpeý týraly bultartpaý sharasy kúshinde – Bas prokýratýra

Májilistiń jalpy otyrysynan keıin BAQ ókilderi Bas prokýrordyń orynbasary Jandos Ómirálıevten Ulttyq qaýipsizdik komıteti tóraǵasynyń burynǵy orynbasary Samat Ábishke qatysty qandaı bultartpaý  sharasy taǵaıyndalǵanyn surady, dep habarlaıdy Kazinform.

«Qylmystyq is boıynsha bultartpaý sharasy ózgertilgen joq. Ol eshqaıda ketpeý jónindegi bultartpaý sharasy óz kúshinde. Eshqandaı bultarý nemese jaýap berýge kelmeý sııaqty faktileri bolmaǵan sebepti bultartpaý sharasy ózgertilgen joq», - dedi ol.

Sondaı-aq Jandos Ómirálıev atalǵan tulǵanyń qandaı bap boıynsha tergelip jatqanyn naqtylady.

«Ol laýazymdy ókilettigin asyra paıdalaný boıynsha qylmystyq is qozǵalyp, sol bap boıynsha tergelip jatyr. Ol tergeý barysynda», - dedi Bas prokýrordyń orynbasary.

«Ketip qala ma dep oılamaısyz ba?», - dep surady jýrnalıst.

«Oǵan eshqandaı negiz joq», - dedi Jandos Ómirálıev.