Samarqannan Túrkistanǵa tikeleı reıster ushady

Ózbekstandyq Silk Avia avıakompanııasy Samarqan – Túrkistan – Samarqan baǵytynda reıster ushyra bastaıdy. Kazinform bul týraly UzA-ǵa silteme jasap habarlaıdy.

Uzbekistan Airports aktsıonerlik qoǵamynyń málimetinshe, alǵashqy demoreıs bıylǵy 14 qazanda jolaýshylardy charter arqyly tasymaldaıdy. Ushý uzaqtyǵy – 1 saǵat 20 mınýt.

«Aldaǵy ýaqytta Samarqannan Túrkistanǵa jolaýshylar tasymalyn turaqty reıster qataryna qosý josparlanǵan. Sonymen qatar Qazaqstan tarapynyń bastamasymen áýe kompanııasy Ferǵanadan Túrkistanǵa ushatyn reıster engizýdi qarastyryp jatyr», – dep tolyqtyrdy Silk Avia baspasóz qyzmetinen.

Silk Avia Ózbekstan qalalaryna turaqty reısterdi bıylǵy 25 sáýirde iske qosty. Al alǵashqy halyqaralyq baǵytyn tamyz aıynda Qyrǵyzstannyń Yssyq kóline jasady. Qazirgi ýaqytta ózin loýkoster retinde tanystyratyn kompanııa parkinde 70 oryndyq ATR 72-600 tıpti úsh áýe kemesi bar.