Samarqandtaǵy kórmede Ámir Temirdiń syıǵa tartqan týy men tarıhı jádigerleri qoıyldy
ASTANA. KAZINFORM – Samarqand memlekettik mýzeı-qoryǵy aýmaǵynda Saıypqyryn Ámir Temirdiń týǵanyna 690 jyl tolýyna oraı erekshe mánge ıe kórme uıymdastyryldy, dep habarlaıdy ÓzA.
Atalǵan mádenı is-sharany Qazaqstannyń Samarqandtaǵy Bas konsýldyǵy men «Áziret Sultan» ulttyq mýzeı-qoryǵy birlese ótkizip, kórmege Túrkistan qalasyndaǵy uly rýhanı ortalyq – Qoja Ahmet ıAssaýı kesenesiniń epıgrafıkalyq órnekteri men sırek tarıhı eksponattary qoıyldy.
Saıypqyryn Ámir Temirdiń tikeleı bastamasy jáne qamqorlyǵymen boı kótergen Qoja Ahmet ıAssaýı kesenesi – Túrkistan tórindegi ortaǵasyrlyq sáýlet óneriniń teńdessiz jaýhary. Sopylyq ilimniń negizin qalaǵan Qoja Ahmet ıAssaýı qurmetine turǵyzylǵan bul kesene ıÝNESKO-nyń Búkilálemdik muralar tizimine engen Qazaqstan aýmaǵyndaǵy alǵashqy tarıhı nysan retinde erekshe qundylyqqa ıe.
Kórmeniń saltanatty ashylý rásimine Qazaqstannyń Samarqandtaǵy Bas konsýly Talǵat Sharıpov, Samarqand oblysy ákimdigi ókilderi, mýzeı isiniń mamandary jáne mádenıet salasynyń belsendileri qatysty.
Іs-shara barysynda sóz alǵan Qazaqstannyń «Áziret Sultan» ulttyq mýzeı-qoryǵy dırektorynyń orynbasary Ahmed Sısenbaı Qoja Ahmet ıAssaýı kesenesindegi hıkmetter men epıgrafıkalyq órnekterdiń tek kórkemdik mura ǵana emes, tereń rýhanı tanymǵa jeteleıtin baǵa jetpes qazyna ekenin atap ótti. Onyń aıtýynsha, bul eskertkish túrki halyqtarynyń ortaq tarıhı tamyryn aıqyn kórsetip, mádenı baılanystardy nyǵaıtýda mańyzdy ról atqarady.
Kórme aıasynda sultan saraıynyń maketi, kesene qurylysyna paıdalanylǵan kirpishtiń túpnusqa úlgisi, Saıypqyryn Ámir Temir tarapynan saraıǵa syıǵa tartylǵan týdyń kóshirmesi jáne basqa da biregeı tarıhı jádigerler kópshilik nazaryna usynyldy. Osyndaı sharalardyń kóptep uıymdastyrylýy kórermenderge túrki áleminiń ortaq tarıhı murasyn tereńirek tanyp-bilýge múmkindik berip, mádenı sabaqtastyq pen rýhanı baılanysty nyǵaıta túsedi.
Eske sala keteıik, 11 sáýir kúni Qazaqstan men Ózbekstan prezıdentteri Buharanyń tarıhı oryndaryn aralady.
