Samarqandta Qazaqstannyń konstıtýtsııalyq sot tóreligindegi tsıfrlyq tásilderi tanystyryldy
ASTANA. KAZINFORM — Samarqandta ótken Azııa Konstıtýtsııalyq Sottary jáne balamaly ınstıtýttar qaýymdastyǵynyń VII Kongresinde Qazaqstan tsıfrlandyrý jáne jasandy ıntellekt jaǵdaıyndaǵy konstıtýtsııalyq sot tóreligine qatysty óz tásilderin tanystyrdy. Іs-sharaǵa 18-den astam eldiń sot ókilderi men halyqaralyq sarapshylar qatysty. Bul týraly Konstıtýtsııalyq sottyń baspasóz qyzmeti málim etti.
1–2 qazanda Samarqand qalasynda «Tsıfrlandyrý jáne jasandy ıntellekt jaǵdaıyndaǵy konstıtýtsııalyq sot tóreligi» taqyrybynda Azııa Konstıtýtsııalyq Sottary jáne balamaly ınstıtýttar qaýymdastyǵynyń (AACC) VII Kongresi ótti.
Kongress jumysyna 18-den astam memlekettiń Konstıtýtsııalyq jáne Joǵarǵy sottarynyń basshylary, sondaı-aq halyqaralyq uıymdardyń ókilderi men quqyq salasyndaǵy sarapshylar qatysty.
Qazaqstan Respýblıkasy Konstıtýtsııalyq Sotynyń delegatsııasyn Konstıtýtsııalyq Sot Tóraǵasynyń orynbasary Baqyt Nurmuhanov basqardy. Óz sózinde ol Qazaqstannyń tsıfrlyq transformatsııaǵa qatysty tásilderin tanystyryp, olardyń 2026 jylǵy 15 naýryzda jalpyhalyqtyq referendýmda qabyldanǵan jańa Konstıtýtsııada bekitilgenin atap ótti.
Adam qaýipsizdigin qamtamasyz etý, jeke jáne jarııa múddelerdiń teńgerimi, tsıfrlyq ortanyń qoljetimdiligi, tsıfrlyq etıka men áleýmettik jaýapkershilikti qosa alǵanda, tsıfrlyq ortanyń quqyqtyq negizderin damytýǵa erekshe nazar aýdaryldy.
Kongress qatysýshylary tsıfrlyq ortadaǵy sot bıliginiń táýelsizdigi, adam quqyqtaryn qorǵaý jáne quqyq ústemdigin qamtamasyz etý, jasandy ıntellektini qoldaný, derbes derekterdi qorǵaý, kıberqaýipsizdik jáne protsestik kepildikter máselelerin talqylady.
Kongress qorytyndysy boıynsha konstıtýtsııalyq sot tóreligin damytýǵa, adam quqyqtaryn qorǵaý men quqyq ústemdigin nyǵaıtýǵa, sondaı-aq tsıfrlyq jáne tehnologııalyq transformatsııa jaǵdaıynda halyqaralyq yntymaqtastyqty keńeıtýge baǵyttalǵan Samarqand deklaratsııasy qabyldandy.
Aıta keteıik, buǵan deıin Baqyt Nurmuhanov Konstıtýtsııalyq Sot Tóraǵasynyń orynbasary bolǵanyn jazdyq.
