Samarqand «Ortalyq Azııa – Eýropa Odaǵy» sammıtine qalaı daıyndalyp jatyr - fotoreportaj
SAMARQAND. KAZINFORM – Samarqand qalasy «Ortalyq Azııa – Eýropa Odaǵy» alǵashqy sammıtin qabyldaıdy, dep habarlaıdy Kazinform agenttiginiń menshikti tilshisi Álıhan Asqar.
Kesheden beri ózbek tarapy atalǵan is-sharaǵa qatysý úshin kelip jatqan sheteldik delegattardy qarsy alyp jatyr. Samarqandtaǵy ádettegi mamyrajaı tirshilik osy kúnderi qarbalasqa ulasty. Kóshelerdegi qaýipsizdik sharasy qatańdatylyp, quqyq qorǵaý organdarynyń qyzmetkerleri kúsheıtilgen jumys rejımine kóshti.
Atap aıtqanda, búginnen bastap qalaǵa kiretin joldar jabyldy. Tranzıttik júk kólikterine shahardy aınalyp ótetin marshrýttar usynylyp jatyr. Sonymen qatar, 4 sáýirde Samarqandtyń 10-nan astam kóshesi jabylady. Buǵan qosa, 1 sáýirden bastap stýdentter qashyqtan oqyp jatyr.
Áýejaıdan bastap qaladaǵy barlyq kóshe boıyna Ortalyq Azııa elderiniń týlary ilindi.
Ózbekstan prezıdenti mártebeli meımandardy qarsy alý úshin 2 sáýirde Samarqandqa keldi. Keshe Shavkat Mırzıeev Eýropalyq keńes prezıdenti Antonıý Koshtamen ekijaqty kezdesý ótkizdi. Al búgin Ózbekstanǵa Eýropalyq komıssııa prezıdenti Ýrsýla fon der Lıaıen jáne Eýropalyq qaıta qurý jáne damý bankiniń prezıdenti Odıl Reno-Basso ushyp keldi.
Sonymen qatar birer saǵat buryn Prezıdent Qasym-Jomart Toqaev mingen bort Samarqand áýejaıyna qondy. Memleket basshysyn Ózbekstannyń premer-mınıstri Abdýlla Arıpov kútip aldy.
Búgin Qasym-Jomart Toqaev Eýropalyq keńes prezıdenti Antonıý Koshta jáne Eýropalyq komıssııa prezıdenti Ýrsýla fon der Lıaıenmen kezdesý ótkizedi.
Aýqymdy is-shara erteń, ıaǵnı 4 sáýirde «Congress center» ǵımaratyna ótedi. Onyń barysynan 150-den astam beldi sheteldik basylym men telearnalardyń tilshileri habar taratpaq.
Sammıt aıasynda kólik-logıstıkalyq jobalardy birlesip qolǵa alý, strategııalyq shıkizat baǵytyndaǵy seriktestik, ekologııalyq taza jáne tıimdi energııa óndirý kózderin engizý múmkindikteri talqynalady.
Qosa keteıik, taıaýda Kazinform agenttigine suhbat bergen ózbekstandyq saıasattanýshy Ravshan Nazarov Eýroodaq Orta dálizdiń áleýetine qyzyǵýshylyq bildirip otyrǵanyn málimdep edi.
Eske salsaq, «Ortalyq Azııa – Eýropa Odaǵy» formatyndaǵy alǵashqy sammıt byltyr kóktemde ótýi tıis bolǵan. Degenmen ol Eýroodaqtyń basshylyq quramyndaǵy ózgeristerge baılanysty keıinge qaldyryldy.