Samaradaǵy gıps óndirisi jobasy Qazaqstan bıýdjetine 180 mln teńge kiris ákelýi múmkin
ASTANA. KAZINFORM- Eýrazııalyq ekonomıkalyq komıssııa (EEK) Keńesiniń onlaın formatta ótken kezekti otyrysynda Qazaqstan qatysatyn eki jańa kooperatsııalyq joba qaraldy, dep habarlaıdy Úkimettiń baspasóz qyzmeti.
Olardyń biri Máskeý oblysynda AKRÝS lak-boıaý ónimderin óndiretin kásiporyn salýdy, ekinshisi Samara gıps kombınaty bazasynda jańa aralastyrý jelisin iske qosýdy kózdeıdi. Ekinshi jobany iske asyrýdan túsetin salyq túsimderi esebinen Qazaqstan bıýdjeti úshin boljamdy ekonomıkalyq tıimdilik shamamen 180 mln teńgeni quramaq.
Komıssııanyń Qazaqstan tarapyn Premer-mınıstrdiń orynbasary – ulttyq ekonomıka mınıstri Serik Jumanǵarın basqardy.
Máskeý oblysynda AKRÝS lak-boıaý ónimderin óndiretin kásiporyn salý jónindegi kooperatsııalyq joba sóz boldy. Munda qoldanystaǵy analogtarmen salystyrǵanda korrozııa men ot áserinen qorǵaý sıpattamalary joǵary lak-boıaý materıaldaryn shyǵarý josparlanyp otyr. Jobany júzege asyrý bes jylǵa eseptelgen jáne onyń jumysy bıyl bastalady.
Jobaǵa Belarýstiń «Orıon-VK» ǵylymı-óndiristik kásiporny, materıaldar men tehnologııalyq jabdyqtardyń bir bóligin jetkizýdi qamtamasyz etetin qazaqstandyq «ASYL CONSTRUCTION» JShS jáne reseılik «AKZ pokrytııa» JShQ qatysady.
Taǵy bir jańa kooperatsııalyq joba Samara gıps kombınaty bazasynda jańa aralastyrý jelisin salýdy kózdeıdi. Joba barysynda qurylys jáne arnaıy maqsattaǵy qurǵaq qospalar óndirisin jylyna 75,5 myń tonnaǵa ulǵaıtý qarastyrylǵan.
Qazaqstan tarapynan jobaǵa ınjenerlik jáne qurylys qyzmetterin kórsetetin «Elıta» JShS, al Belarýs tarapynan «Remeza» JAQ qatysady. Osy jobany iske asyrýdan túsetin salyq túsimderi esebinen Qazaqstan bıýdjeti úshin boljamdy ekonomıkalyq tıimdilik shamamen 180 mln teńgeni quramaq.
Esterińizge sala keteıik, 2025 jyly Aqmola oblysynda aýyl sharýashylyǵy tehnıkasyn óndirý boıynsha kooperatsııalyq joba maquldandy.
EAEO-daǵy kooperatsııalyq jobalar jobany iske asyrýǵa beriletin qaryzdar boıynsha paıyzdyq mólsherlemeni sýbsıdııalaý esebinen tómendetilgen mólsherlememen jeńildetilgen qarjylandyrý alady. Bul jobalar tehnologııalyq damýǵa jáne óndiristiń jańa modelderin qalyptastyrýǵa, sondaı-aq ekonomıkalyq odaqqa múshe elder arasyndaǵy saýda-ekonomıkalyq baılanystardy keńeıtýge yqpal etýge baǵyttalǵan.
Keńes otyrysynda agrarlyq salaǵa qatysty birqatar qujattarǵa da túzetýler qabyldandy. Atap aıtqanda, aýyl sharýashylyǵy daqyldarynyń sorttyq egistikterin dalalyq aprobatsııalaý ádisine ózgerister engizý týraly sóz boldy.
Budan bólek, EAEO elderiniń kedendik shekarasy men aýmaǵynda karantınge jatqyzylatyn ónimder men obektilerge qoıylatyn Biryńǵaı karantındik fıtosanıtarııalyq talaptarǵa ózgerister engizý týraly sheshim qabyldandy. Olar qyzanaq, burysh jáne baklajan beıim keletin pepıno mozaıkasy vırýsyna qatysty karantındik fıtosanıtarııalyq sharalardy qoldanýdy ońtaılandyrýǵa baǵyttalǵan.
Eldegi karantındik fıtosanıtarııalyq qaýipsizdiktiń jetkilikti deńgeıin qamtamasyz etý shartymen atalǵan ónimderde osy vırýstyń bolmaýy týraly talapty alyp tastaý kózdelip otyr.
Sondaı-aq EAEO elderiniń kedendik shekarasy men aýmaǵynda karantındik fıtosanıtarııalyq baqylaýǵa jatatyn karantınge qoıylatyn ónimder tizbesine ózgerister engizý týraly sheshim qabyldandy. Atap aıtqanda, Biryńǵaı talaptarda kózdelgen tańbasy bolǵan jaǵdaıda, aǵashtan jasalǵan qaptama jáne bekitý materıaldaryna fıtosanıtarııalyq sertıfıkatty mindetti túrde resimdeý talaby joıylady.
Bul ózgerister EAEO elderiniń aýmaǵynda tıisti ónimderdi óndirý jáne saýdalaý úshin neǵurlym qolaıly jaǵdaılar jasaýǵa baǵyttalǵan.
Keńes otyrysynda Keden odaǵynyń «Oıynshyqtardyń qaýipsizdigi týraly» tehnıkalyq reglamentine de ózgerister qabyldandy. Túzetýler 14 jasqa deıingi balalarǵa arnalǵan oıynshyqtarǵa qoıylatyn mindetti talaptardy belgileıdi jáne tutynýshylardy ónim týraly dáıeksiz aqparattan qorǵaýǵa, sondaı-aq belgilengen qaýipsizdik normalaryna sáıkes kelmeıtin oıynshyqtardyń aınalymǵa shyǵarylýyna jol bermeýdi qarastyrady.
Taraptar sondaı-aq basqa da salalar men Komıssııanyń qyzmetine qatysty birqatar ózge de rásimdik máselelerdi talqylap, olar boıynsha sheshimder qabyldady.
