«Samara-Shymkent» trassasynda 1 adam qaza bolyp, 8-i aýrýhanaǵa tústi

QYZYLORDA. QazAqparat – Qyzylorda oblysynda «KamAZ» ben jeńil kóliktiń soqtyǵysýynan 1 adam qaza bolyp, 8-i zardap shekti, dep habarlaıdy QazAqparat Polisia.kz-ke silteme jasap.

Oqıǵa 27 mamyr kúni saǵat 15:30 shamasynda «Samara-Shymkent» tasjolynda bolǵan. Jalaǵash aýdany Aqqum aýylynyń tusynda sheteldik nómirli jeńil mashına men «KamAZ» júk kóligi soqtyǵysqan.

«Saldarynan bir jolaýshy mert bolyp, segiz adam medıtsınalyq mekemege jetkizildi. QR Qylmystyq kodeksiniń 345-baby 3-bóligimen (avtomobıldi basqaratyn adamnyń jol júrisi qaǵıdalaryn buzyp, abaısyzda adam ólimine ákep soǵý) sotqa deıingi tergeý bastaldy. Qylmystyq is boıynsha barlyq qajetti sot saraptamalary taǵaıyndaldy. Mán-jaıy anyqtalyp jatyr», - delingen aqparatta.

Qyzylorda oblysynda jyl basynan jol erejelerin buzýǵa qatysty 48 myńnan astam fakti tirkelgen.