«Samara – Shymkent» avtobanynyń beton plıtasy kóterilip ketti

TÚRKІSTAN. QazAqparat - «Samara – Shymkent» tasjolynyń «Qyzylorda – Shymkent» aqyly ýchaskesinde tsement-beton plıtasy kóterilip ketti, dep habarlaıdy QazAqparat tilshisi.

Áleýmettik jelide «Túrkistan-Shymkent» baǵytyndaǵy jolda tsement plıtanyń kóterilip ketkendigi týraly vıdeo tarady. Jaǵdaı Tórtkól kenti aýmaǵynda oryn alǵan. Jol ortasyndaǵy úlken plıtalar ajyrap, kólikterdiń júrýine kedergi týdyrdy.

«QazAvtoJol» UQ» AQ baspasóz hatshysy Lázzat Stamǵazıeva qazirgi tańda «ShymkentJolQurylys» JShS merdiger uıymy joldy qalpyna keltirý jumystaryn aıaqtaǵanyn málim etti.

«10 jol qyzmetkeri jáne 5 arnaıy tehnıka (3 samosval, 1 tıegish, 1 gıdromolot) jumyldyryldy. Qajet jol belgileri ornatyldy. Jergilikti polıtsııa patrýldeý júrgizip jatyr», - dedi Lázzat Stamǵazıeva.