Samara mańyndaǵy jol apatynan eki qazaqstandyq qaza tapty
ASTANA. KAZINFORM — Olardyń máıitteri Qazaqstanǵa jetkizildi, dep habarlady TJM.
Qazaqstan TJM Reseıdegi JKO saldarynan zardap shekken azamattardy evakýatsııalaýdy uıymdastyrdy.
5 qańtarǵa qaraǵan túni Qazaqstan TJM Komandalyq ortalyǵyna Reseı TJM-nen «Samara-Bolshaıa Chernıgovka» federaldy avtojolynyń 101 km bolǵan jol-kólik oqıǵasy týraly aqparat tústi. Apat saldarynan Qazaqstannyń jeti azamaty zardap shekti. Zardap shekkenderdi Reseıge tasymaldaý úshin Batys Qazaqstan TJ departamentiniń qutqarýshylary men psıhologtaryn, sondaı-aq jergilikti densaýlyq saqtaý basqarmasynyń jedel járdem qyzmetkerlerin qamtıtyn jıyntyq kolonna jiberildi.
Oqıǵa ornyna kelgennen keıin zardap shekkenderdiń Bolshaıa Glýshıtsa aýylynyń, Novokýıbyshevsk jáne Samara qalalarynyń medıtsınalyq mekemelerine jatqyzylǵany anyqtaldy. Bul mekemelerde Qazaqstan TJM psıhologtary zardap shekkenderge shuǵyl psıhologııalyq kómek kórsetti. Qaıtar jolda zardap shekkenderdiń barlyǵy otandyq mamandardyń turaqty baqylaýynda boldy.
— Búgin tańerteń zardap shekkendermen birge jıyntyq kolonna Qazaqstanǵa aman-esen keldi, onda patsıentter Oral qalasyndaǵy qalalyq jáne oblystyq kópsalaly aýrýhanalarǵa tapsyryldy. Barlyǵy jeti naýqas, onyń ishinde eki bala jetkizildi. Ókinishke qaraı, apat saldarynan eki adam qaza tapty, olardyń máıitteri de Qazaqstanǵa jetkizildi. Bul operatsııaǵa Tótenshe jaǵdaılar departamenti men oblystyq densaýlyq saqtaý basqarmasynan 23 adam men 8 tehnıka jumyldyryldy, — delingen mınıstrlik habarlamasynda.
Avtokolonnany Oral qalasynan shekara ótkeline deıin jáne qarsy baǵytta alyp júrý úshin oblystyq polıtsııa departamentiniń qyzmetkerleri jumyldyryldy.
— Qazaqstannyń Tótenshe jaǵdaılar mınıstrligi qaza bolǵandardyń otbasylaryna kóńil aıtyp, azamattarǵa jolda saqtyq pen muqııat bolý mańyzdylyǵyn eske salady. Kólik júrgizý kezinde abaı bolyńyz, qaýipsizdikti saqtańyz jáne qaıǵyly oqıǵalardy boldyrmaý úshin jol qozǵalysy erejelerin saqtańyz, — dep eskertti vedomstvo.
Eske salsaq, buǵan deıin «Samara — Bolshaıa Chernıgovka» tas jolynda (RF Samara oblysy) bolǵan jol apatynan zardap shekken 7 adam Oral aýrýhanasyna jetkizilgenin habarladyq. bolǵan.