Samara mańynda jol apatynan zardap shekken 7 adamnyń altaýy aýrýhanada jatyr

ORAL. KAZINFORM – Reseıdiń Samara oblysynda jol apatynan zardap shekken 7 adamnyń altaýy Oral qalasyndaǵy aýrýhanada emdelip jatyr.

BQO densaýlyq saqtaý basqarmasynyń basshysy Madııar Óteshevtiń óńirlik kommýnıkatsııalar qyzmeti alańynda ótken brıfıngte málim etkenindeı, jaraqat alǵandardyń ishinde 5 eresek adam qalalyq kópbeıindi aýrýhanaǵa jetkizilgen. 

Onyń sózine qaraǵanda, 41 jastaǵy patsıent medıtsınalyq kómekten bas tartqan. 

— Qazirgi tańda atalmysh aýrýhanada 40 jastaǵy áıel jansaqtaý bólimshesinen hırýrgııaǵa aýystyryldy. Neırohırýrgııada 1, polıtravma bólimshesinde 2 patsıent jatyr (21-23 jas aralyǵyndaǵy jigitter). Báriniń de jaǵdaılary ortasha aýyr. Oblystyq kópbeıindi balalar aýrýhanasyna jetkizilgen 6 jáne 15 jastaǵy qyz balalar travmatologııa bólimshesinde emdelýde. Jaǵdaılary aýyr dep baǵalanyp otyr, turaqty. Patsıentterdiń barlyǵy qajetti emderin alyp jatyr, — dedi M.Óteshev.

Brıfıngte sondaı-aq BQO TJ departamenti tótenshe jaǵdaılardy joıý basqarmasynyń bastyǵy Nuraly Músıev atalǵan jol apatynan zardap shekken qazaqstandyqtardy evakýatsııalaý qalaı uıymdastyrylǵanyn aıtyp berdi. Ókinishke qaraı, qaza tapqan eki adamnyń máıitteri de Qazaqstanǵa jetkizilgen.

Bul operatsııaǵa TJ departamenti men oblystyq densaýlyq saqtaý basqarmasynan 23 adam men 8 tehnıka jumyldyryldy. Avtokolonnany Oral qalasynan shekara ótkeline deıin jáne keri baǵytta oblystyq polıtsııa departamentiniń qyzmetkerleri alyp júrdi.

Eske sala keteıik, budan buryn Samara mańyndaǵy apattan keıin 7 qazaqstandyqtyń Oral aýrýhanasyna jetkizilgenin jazǵan bolatynbyz.

Samara mańyndaǵy jol apatynan eki qazaqstandyq qaza tapty.