Samara - Almaty baǵytynda jańa áýe reısi ashyldy
NUR-SULTAN. QazAqparat - Azamattyq avıatsııa komıteti reseılik «Severnyı veter» (Nordwind) áýe kompanııasyn akkredıtatsııadan ótkizdi, dep habarlaıdy QazAqparat Azamattyq avıatsııa komıtetine silteme jasap.
QR IIDM Azamattyq avıatsııa komıteti halyqaralyq áýe tasymaly geografııasyn keńeıtý boıynsha jumysty jalǵastyrýda.
«Búgin Azamattyq avıatsııa komıteti Qazaqstan Respýblıkasynda «Severnyı veter» (Nordwind) reseılik avıakompanııasynyń akkredıtteý týraly kýálik berdi. Kóktemgi-jazǵy navıgatsııa kezeńinde «Severnyı veter» áýe kompanııasy Samara-Almaty baǵyty boıynsha aptasyna 1 ret turaqty túrde jolaýshylardy tasymaldaýdy josparlap otyr. Qazaqstanǵa ushýlar Boeing 737 jáne Airbus 321 ushaqtarynda oryndalady» delingen habarlamada.
Áýe kompanııasynyń parki Boeing jáne Airbus ushaqtarynyń eń tanymal úlgilerinen jasaqtalǵanyn atap ótken jón.
Qazaqstannyń barlyq halyqaralyq baǵyttaǵy reısteriniń 1/3 bóligi Reseımen baılanysqan. Azamattyq avıatsııa komıtetiniń Qazaqstan Respýblıkasy men Reseı Federatsııasynyń áýe qatynasy damytý boıynsha jumysy jalǵasatyn bolady.
Aıta keteıik, «Severnyı veter» (Nordwind) áýe kompanııasy 2008 jyly qurylǵan. Búgingi tańda «Severnyı veter» Reseı Federatsııasynyń jolaýshylar tasymaly boıynsha alǵashqy 10 áýe kompanııasynynyń qataryna enedi jáne osy kúnge deıin reseılik azamattyq avıatsııa salasynyń damý ındıkatorlarynan joǵary ósý qarqynyn kórsetip keledi.
