Samalǵa sheteldik rejısserlerden kóptegen usynystar túsip jatyr - Sergeı Dvortsevoı

Reseılik kınorejısserdiń sózinshe, 6 kúndik ómirdi beıneleıtin «Aıka» fılmi alty jyl kóleminde túsirilgen.

«Nege uzaq túsirildi dep surasańyzdar, aıtaıyn. Kıno bul eń aldymen óner. Mundaı fılmder tez arada túsirilmeıdi. Onyń túsirilimi, oqıǵa jelisi, ásirese áıeldiń júktiligi men úshin óte aýyr boldy. Sonymen qatar fılm bastapqyda qysta, qar jaýyp turǵan kezde túsirildi. Al, Máskeýde osy jyly ǵana qar kóp jaýdy. Aldyńǵy eki jylda qar tipten az boldy.  Biz qar izdep  Mýrmansk qalasyna da bardyq. Biraq bári sátsiz bolyp, sol qardy Máskeýde kútýge týra keldi. Men mundaı fılmder túsirgende ýaqytqa emes, nátıjesi bolǵanyna kóńil bólemin»,- deıdi kınorejısser.

Ol sondaı-aq atalǵan kórkem fılmniń ózge týyndylardan aıyrmashylyǵy ózektiliginde dep biledi. Sebebi, «Aıka» fılminiń oqıǵa jelisinde  qazirgi zamandaǵy  birqatar áleýmettik máseleler kóterilgen.

«Máselen, Máskeýde mıgranttar problemasy birneshe jyldan beri ózekti sanalady. Ol tek Reseıde ǵana emes, barlyq damyǵan memleketterde bar jaıt. Barlyǵyn tolǵandyrady. Bireý jaqsy ómir súrgisi kelse, ekinshi adam ony qabyldamaıdy. Sodan kóp qıynshylyqtarǵa tap bolady. Men osy fılmdi túsirer aldyn bir málimet oqydym. Máskeýde bir jylda 250-deı áıel bosanyp, nárestelerinen bas tartqan. Sábılerin perzenthanadarda qaldyryp ketken. Bul jáıt maǵan qatty áser etti. Nege deseńiz, men osy Shymkentte týyp-óstim, azııalyq áıelderdiń balasynan bas tartýy men úshin de jat nárse. Men sodan keıin bul máseleniń sebebine  úńilip, zerttep kórdim, ne sebepti bas tartady dep. Ómir bolǵan soń ártúrli jaǵdaı bolady ǵoı. Bireý uzaq ýaqyt jumys istep júrip tanysady, otbasyn qurady. Al, endi bireýler júkti bolyp qalyp, sábıin eline alyp qaıtýǵa qorqady. Uıalatyndar bar. Úshinshi jaǵdaıda alyp shaharda nárestemen ómir súrý óte qıyn. Bul fılmde áıel bosanyp, óziniń balasyn qaıtarýǵa yntyq bolady. Sońǵy epızodta ol balasyn emizedi»,- deıdi Sergeı Dvortsevoı.

Rejısser kınonyń mundaı dárejege jetýine birinshi kezekte talantty aktrısa Samal Eslıamovanyń kóp eńbeginiń arqasy dep biledi.  Kann kınofestıvalinde «Úzdik áıel róli» atalymynda júldeger atanǵanyn estigende, kózine jas alǵanyn da jasyrmady. Sergeı Dvortsevoıdyń aıtýynsha, Samal bul óner salasyndaǵy jaýhar dep aıtýǵa bolady. Onyń árbir iske jaýaptylyǵy men minez-qulqy, akterlik sheberligi «Úzdik aktrısa» atanýyna ábden laıyq.

«Barlyq akterler sheberlikti oqyp, úırenedi. Degenmen Samal akterlik tehnıkany sheber meńgergen. Ol Máskeýdegi Reseı teatr óneri ınstıtýtyn (GITIS) támamdaǵan. Evgenıı Kamenkovıchten dáris alyp, sheberligi shyńdalǵan. Ol jáı ǵana róldi somdaı bermeıdi. Sol keıipkerdiń taǵdyryn ózi arqyly ótkizip, rólin taza oryndap shyǵa alady. Máselen, kıno úlken mıkroskop sııaqty. Ol betindegi emotsııany ǵana kórsetip qana qoımaı, ájimderińdi, kózdiń nuryn bárin kórsetedi. Teatrdan aıyrmashylyǵy da sol. Samal kınoǵa ábden beıimdelgen halyqaralyq dárejedegi, sırek kezdesetin aktrısa dep aıtar edim. Osy fılm túsirilgen alty jyldyń ishinde Samal esh ózgermedi. Múmkin sondaı jas shamasy shyǵar. Qazirdiń ózinde oǵan sheteldik rejısserlerden usynystar túsip jatyr. Jýyrda Dat eliniń rejısseri Tomas Vıttenbergten shaqyrtý aldy. Aldaǵy ýaqytta aǵylshyn tilin jaqsy meńgerip alsa, ondaı usynystar kóbeıedi degen oıdamyn»,- deıdi kınorejısser.

Shymkenttiń týmasy sonymen qatar Kann festıvalinde Samalmen birge 20 shaqty kınofılmge túsken aktrısalar básekeles bolǵanyn aıtady.  Basym kópshiligi álemdik dárejede tanymal rejısserler túsirgen fılmder bolǵan. Qazylar alqasy bastapqyda Polshanyń  Pavel Pavlekovskıı degen rejısser túsirgen fılmniń aktrısasy úzdik bolady dep boljapty.

«Biz kıno týyndymyzdy qazylar alqasyna eń sońǵy bolyp usyndyq. Sebebi odan erte úlgermedik. Qosymsha ýaqyt alyp júrip, bitirdik áıteýir.  «Aıka»  fılmin kórgennen keıin qazylar alqasynyń pikiri birden ózgerdi. Tipti konkýrsta kıno kórsetilgennen keıin kınozaldan bári shyǵyp bara jatqanda Samaldy bir áıel qushaqtap, eki mınýttaı solaı turdy. Biz ol áıeldiń Kann festıvaliniń qazylar alqasynyń tóraıymy Keıt Blanshett ekenin keıin bildik. Gollıvýd juldyzy, «Oskar» syılyǵynyń laýreaty Keıt maǵan keıin jolyǵyp, ózi aıtty. Qazylar alqasy bastapqyda Polsha aktrısasyn tańdap, keıin barlyǵy Samaldy biraýyzdan qoldaǵan»,-deıdi  Sergeı Dvortsevoı.

Rejısser sondaı-aq ázirge Qazaqstanda qandaı da bir kıno túsirýdi josparlamaǵanyn aıtady. Dese de elimizdiń Mádenıet jáne sport mınıstrliginen usynys túskenin atap ótti. Al, onyń  «Aıka» jáne «Tıýlpany» atty qos fılmi endi Qazaqstanda kúz aılarynda jappaı kórsetiletin bolady. Ekeýinde de qazaq aktrısasy Samal Eslıamova analardyń rólin somdaǵan.