Samal Eslıamova SQO-daǵy týǵan aýylyna bardy
PETROPAVL. QazAqparat - Qazaqstandyq aktrısa, Kann kınofestıvaliniń júldegeri Samal Eslıamova Aqqaıyń aýdany Aralaǵash aýylynyń turǵyndarymen kezdesti, dep habarlaıdy QazAqparat tilshisi.
Óńirlik kommýnıkatsııalar qyzmetiniń aqparaty boıynsha, aýyl turǵyndarymen kezdesý Samal oqyǵan K.Orazov atyndaǵy orta mektepte ótken.
«Búgin búkil álem Qazaqstan týraly, elimizdiń ekonomıkalyq jáne saıası jetistikter týraly biledi. Elimizdiń, oblysymyz ben aýdanymyzdyń atyn shyǵarǵanyńyz úshin qýanyshtymyz», - dep atap ótti Aqqaıyń aýdanynyń ákimi Dáýren Baıtóleshov.
Ol Samaldyń ata-anasy men ustazdaryna tálim-tárbıe bergeni úshin alǵys aıtty.
«Samal oqýshy kezinde sypaıy, sabyrly jáne jaýapty qyz boldy. Ol barlyq tapsyrmalarǵa jaýapty qaraıtyn. Onyń baısaldylyǵy álige deıin boıynda saqtalyp qalǵan. Ony Kann festıvalinde marapattaý kezinde kórdińizder», - dedi synyp jetekshisi Gúlnaz Bekmaǵambetova.
Samal týǵan aýyly, mektebi týraly aıta otyryp, Aralaǵashta alǵash ret bilim alǵanyn tilge tıek etti.
«Ómirimniń alǵashqy bóligi Aralaǵashta ótti. Men osy jerde óstim, bilim aldym. Dál osy jerde alǵashqy bilimim qalandy. Birneshe jyldan beri Máskeýde turatynyma qaramastan, óz Otanym týraly sóz alǵanda Petropavldy emes, Aralaǵash týraly aıtamyn», - dep bólisti aktrısa.
