Samal Eslıamova men Danııar Alshynov frantsýz serıalyna túsedi
«INFINITI shaǵyn-serıalynyń túsirilimi bastalǵanyn habarlaýǵa qýanyshtymyz, bul – qyzyqty tergeý jumystary jáne burynǵy keńestik qala Baıqońyrdyń shalǵaı jerinen Halyqaralyq ǵarysh stantsııasynyń modýlderine alǵashqy saıahat. Bul trıller qazaqtyń ásem dalasyn ǵaryshtyń qozǵalyssyz máńgiligine qarama-qaıshy qoıady», - delingen Canal+ frantsýz telekanalynyń anonsynda.
1 naýryz kúni bastalǵan túsirilim Qazaqstan, Ýkraına jáne Frantsııa aýmaǵynda júrgiziledi. Rejısser - Terrı Pýro.
Basty rólderdi frantsýz aktrısasy Selın Sallet jáne qazaqstandyq akter Danııar Alshynov oınaıdy. Sonymen qatar, serıalǵa qazaqstandyq aktrısa Samal Eslıamova túsedi.
Serıal mazmunyna sáıkes, Halyqaralyq ǵarysh stantsııasy baılanysqa shyqpaı qoıady. Al onyń ekıpajy apatqa ushyraý aldynda. Onymen bir mezgilde, Qazaqstanda turǵyn úıdiń shatyrynan amerıkalyq astronavt, Halyqaralyq ǵarysh stantsııasynda bolýy tıis Entonı Kýrtstyń basynan aıyrylǵan denesi tabylady. Ǵarysh baǵdarlamasynan shettetilgen frantsýz astronavty Anna Zaratı jáne qazaqstandyq polıtseı Isaak Turǵyn bul ǵajaıyp paradoksty tergeýge tyrysady.
«Jıyrma selfteıp, bir jyldyq tosý, zýmda saǵattarǵa sozylǵan oqýlar, aqyrynda men osyndamyn. Halyqaralyq serıaldaǵy meniń alǵashqy rólim. Árqaısysy bir saǵattan 6 serııa, stsenarııinen bas alý múmkin emes, qamqor tamasha komanda, alańdaǵy asa talantty áriptester. Osynyń barlyǵy úshin, ómir súrý, jańa dúnıeni jasaý, qýaný múmkindigi úshin sheksiz alǵys. Al, kettik!...», - dep jazdy D.Alshynov Instagram-da.
Eske salaıyq, D.Alshynov bıylǵy qańtarda Nıý-Iorktegi IMDb Halyqaralyq baıqaýynda «Boı Atbaıa» fılmi úshin «Eń úzdik dramalyq akter» nomınatsııasyn jeńip alǵan bolatyn.
Al Samal Eslıamova 2018 jyly 71-inshi Kann kınofestıvalinde úzdik dep tanylǵan bolatyn. Aktrısa reseılik rejısser Sergeı Dvortsevoıdyń «Aıka» atty kartınasynda basty róldi somdady.
Keıin Elbasy Nursultan Nazarbaev Samal Eslıamovaǵa «Qazaqstannyń eńbek sińirgen qaıratkeri» ataǵyn tabystady. 2019 jyldyń naýryzynda ol Gonkongta ótken Azııa kınoakademııasynda (Asian Film Awards Academy) «Azııanyń úzdik aktrısasy» syılyǵyna ıe boldy.
