«Salyq keshbek». Chek skanerleý arqyly syıaqy alatyn óńirler ataldy

ASTANA. KAZINFORM — Baqylaý-kassa mashınalarynyń fıskaldyq chekteri boıynsha syıaqylar tóleý jónindegi «Salyq keshbek» pılottyq jobasy qaıta bastaldy, dep habarlaıdy Memlekettik kirister komıteti.

Memlekettik kirister komıteti mıkro jáne shaǵyn bıznes sýbektileri bergen baqylaý-kassa mashınalarynyń fıskaldyq chekteri boıynsha syıaqylar tóleýge baǵyttalǵan 2025 jylǵy 15 naýryzda bastalatyn «Salyq keshbek» pılottyq jobasynyń qaıta jańǵyrtylatyny týraly habarlaıdy.

«Salyq keshbek» jobasynyń birinshi kezeńi oń nátıje kórsetti: berilgen chekterdiń sany 2 esege artty, al osy chekter boıynsha somma 32%-ǵa ósti. 2024 jylǵy 2 jartyjyldyq 2023 jylǵy 2 jartyjyldyqpen salystyrǵanda, joba Semeı qalasynda, Abaı oblysynda jáne Aqkól aýdanynda iske asyryldy.

Jobanyń ekinshi kezeńinde ony iske asyrý myna aýmaqtardy qamtıdy:

— Óskemen qalasy, Shyǵys Qazaqstan oblysy;

— Jetiqara aýdany, Qostanaı oblysy;

— Jaqsy aýdany, Aqmola oblysy;

— Arshaly aýdany, Aqmola oblysy.

— «Salyq keshbek» jobasyna kez kelgen adam qatysa alady. Ol úshin taýarlar men qyzmetterge aqy tóleý kezinde (qolma-qol aqshamen de, qolma-qol aqshasyz tásilmen de) fıskaldyq chek alý, «Amian» arnaıy mobıldi qosymshasyndaǵy chekten shtrıh-kodty skanerleý jáne satyp alý somasynyń 2% mólsherinde syıaqy alý qajet. Syıaqylar «IT Analytics» JShS operatory arqyly «Amian» mobıldi qosymshasyn paıdalana otyryp esepteledi. «Amian» qosymshasyn App Store jáne Google Play-da tegin júkteýge bolady, — delingen komıtet habarlamasynda.

Memlekettik kirister komıteti kásipkerlerdi baqylaý-kassa mashınalardy belsendi qoldanýǵa jáne árbir satyp alýshyǵa fıskaldyq chekter berýge shaqyrady, bul tutynýshy quqyǵyn qorǵaýǵa jáne memlekettik bastamalardy qoldaýǵa yqpal etedi.

Buǵan deıin habarlanǵandaı, Serik Jumanǵarın Salyq reformasyn synap júrgenderdiń artynda kim turǵanyn aıtty.