Salymshylardyń 120 mln teńgesin urlaǵan bankırler sottaldy
TÚRKІSTAN. QazAqparat -Oblystyq ІІD tergeýshileriniń kásibı sheberliginiń arqasynda salymshylardyń depozıtindegi aqshalaryn ıemdengen bank qyzmetkerleriniń qylmystyq is-áreketi áshkere boldy. Bul týraly QazAqparat ІІD baspasóz qyzmetine silteme jasap habarlaıdy.
Ótken jyly tamyzynda oblystyq ІІD Tergeý basqarmasymen Maqtaral aýdanyndaǵy jetekshi bank fılıalynyń qyzmetkerleri A.Ýkıbaev, T. Saýranbaev, S. Altenov, B. Kalıbaeva jáne Sh. Aıtoreevalardyń ústinen QR QK-niń 189 «bóten múlikti ıemdenip alý» jáne 385 «jalǵan qujat jasaý» baptary boıynsha sotqa deıingi tergeý amaldary bastalǵan bolatyn.
Polıtseıler 5 bank qyzmetkeriniń kinásin tolyq dáleldep shyqty. Olardyń barlyǵy da aldyn-ala sóz baılasyp, qylmystyq is-áreketterin júzege asyryp otyrǵan. Úsh jyl kóleminde bank klıentteriniń qoltańbasyn jalǵan jasap, aqshalaryn ıemdenip otyrǵan. Nátıjesinde olar salymshylarǵa 120 000 000 teńge kóleminde shyǵyn keltirgen.
2018 jyldyń basynda oblystyq ІІD tergeýshileri kóptomdyq qylmystyq isti aıyptaý aktisimen sotqa joldandy.
Túrkistan oblysy Maqtaral aýdandyq soty qylmystyq toptyń bes múshesine qatysty úkimin shyǵardy, senip tapsyrylǵan bóten múlikti ıemdengeni úshin Ýkıbaev Ajıbek pen Saýranbaev Talǵat 7 jylǵa bas bostandyǵynan aıryldy. Al, Altenov Saken, Kalıbaeva Baktygúl jáne Aıtóreeva Aısholpanǵa shartty túrde jazalar taǵaıyndaldy.
