Salyqtyq tekserýlerdiń tıimdiligi eki ese joǵarylady

ASTANA. QazAqparat - Qazaqstanda salyqtyq tekserýlerdiń tıimdiligi eki esege artty. Bul týraly QR Qarjy mınıstrligi Memlekettik kirister komıteti tóraǵasynyń orynbasary Tileý Janǵarashev málim etti, dep habarlaıdy QazAqparat.

«Búginniń ózinde salyqtyq tekserýler qysqarǵanyn baıqaýǵa bolady. Eger de ótken jyldyń 8 aıynda 53 myńnan astam tekseris bolsa, al bıylǵy jyldyń sáıkes kezeńinde bul kórsetkish 33 myńǵa deıin nemese 37 paıyzǵa azaıdy. Sonymen birge salyqtyq tekserýlerdiń tıimdiligin eki esege joǵarylattyq. Osyndaı jaǵdaı kedendik tekserýler boıynsha  oryn aldy. 2016 jyldyń 8 aıynda 768 tekseris tirkelse, bıyl olardy 26 paıyzǵa qysqarttyq»,-dedi Janǵarashev «Atameken» UKP janyndaǵy Kásipkerlerdiń quqyǵyn qorǵaý jáne sybaılas jemqorlyqqa qarsy is-qımyl keńesiniń otyrysynda.

Onyń atap ótýinshe, kedendik tólemder men ımportqa janama salyqtar boıynsha óndirip alý deńgeıi 55 paıyzǵa artty.

Komıtettiń aldyna qoıǵan negizgi mindertterdiń biri - ol fıskaldyq ákimshilendirýdi jeńildetý men bızneske qatysty qylmystyq jaýapkershilikti negizdi túrde qoldaný. Ol úshin salyq mindettemesin óz erkimen oryndaýdy yntalandyrý, bıznespen seriktestik qarym-qatynasty damytý jáne olarǵa memleket tarapynan jan-jaqty kómek kórsetý mańyzdy.