Salyqtyq raqymshylyq jyl sońyna deıin jalǵasady

NUR-SULTAN. QazAqparat - Shaǵyn jáne orta bıznes sýbektileri salyq qaryzyn tolyq tólegen jaǵdaıda, aıyppul men ósimpul somasyn keshirý sharasy jalǵasady, dep habarlaıdy QazAqparat tilshisi.

Jyl basynan beri atalmysh raqymshylyqqa 37 150 salyq tóleýshi ilinip, 2 mlrd teńgege jýyq ósimpul men aıyppul keshirilgen.

"Salyqtyq raqymshylyq aǵymdaǵy jyldyń sońyna deıin jalǵasady. Zańnamaǵa sáıkes túzetýler engizý jobasy Parlament Májilisinde qaralyp jatyr. Qabyldanǵan jaǵdaıda raqymshylyqqa 1 mln 390 myń adam ilinip, 7,0 mlrd teńge ósimpuldan qutylady. Ol úshin atalǵan top olarǵa 13,9 mlrd teńge somasynda negizgi beresini tóleýi kerek», - deıdi memlekettik kirister komıtetiniń tóraǵasy Marat Sultanǵazıev.

Onyń aıtýynsha, 2018 jylǵy 1 qazandaǵy jaǵdaı boıynsha elimizde 90 077 shaǵyn jáne orta bıznes sýbektisiniń moınynda ótelmegen salyqtyq bereshek bolǵan. Onyń salyq somasy 210,4 mlrd teńge, ósimpuldar - 122,9 mlrd teńge, aıyppuldar - 7,4 mlrd teńge shamasynda.

Memlekettik kirister komıteti salyqtyq raqymshylyq jyldyń sońyna deıin jalǵasatynyn habarlaıdy. Osyǵan oraı, shaǵyn jáne orta bıznes sýbektilerine jınalǵan qaryzdan qutylý arqyly memlekettik kirister organy qoıǵan barlyq shekteýlerdiń kúshin joıýǵa bolatynyn eske salady.