Salyqty adamdardyń erikti túrde tóleýine barynsha jaǵdaı jasalady - Qarjy mınıstri

NUR-SULTAN. QazAqparat – QR Qarjy mınıstri Erulan Jamaýbaev saladaǵy tsıfrlyq transformatsııanyń negizgi ustanymdaryn aıtty, dep habarlaıdy QazAqparat tilshisi.

«Memleket basshysy halyqqa Joldaýynda bıýdjettiń kiris bóligin barynsha arttyrý týraly tapsyrma bergen bolatyn.

Sondyqtan, salyqtyq jáne kedendik ákimshilendirýdi tsıfrlandyrý biz úshin mańyzdy baǵyttardyń biri bolyp otyr. Bul rette, tıisti basty maqsattar men mindetterdi eskerý kerekpiz. Birinshiden, jeke tulǵalar men bıznes úshin salyqtyq mindetterdi oryndaýdyń qarapaıymdylyǵyn qamtamasyz etý. Ekinshiden, kóleńkeli ekonomıka úlesin qysqartý úshin tıimdi tetikterdi jasaý. Úshinshiden, sheshim qabyldaý kezinde adamı faktorlardy azaıtý. Osyǵan oraı, tsıfrlyq transformatsııa 5 prıntsıpke negizdelgen», - dedi E. Jamaýbaev Májilistegi Úkimet saǵatynda.

Onyń aıtýynsha, birinshi baǵdar - azamattar úshin barynsha jaıly ári qolaıly ahýal ornatý. Ekinshisi - adaldyqty yntalandyrý, ıaǵnı salyqtardy ózderi erikti túrde tóleýi úshin barynsha jaǵdaılar jasaý. Úshinshisi - qashyqtan ákimshilendirý. Sheshim qabyldaǵan kezde adamı faktordy boldyrmaý, al azamattar zań buzýshylyqtaryn ózderi joıýǵa múmkindik alýy tıis. Tórtinshisi – zań buzýshylyqtardyń aldyn-alý. ıAǵnı onyń bastapqy satysynda anyqtalýy men aldyn alý boıynsha sharalar qabyldaý. Besinshi baǵdar - júıelerdi ońtaılandyrý. Jańa tehnologııalar men mıkroservıstik arhıtektýraǵa kóshý.

Budan buryn habarlanǵandaı, Qarjy mınıstrliginde memlekettik qyzmettiń 92 paıyzy elektrondy túrde kórsetiletini aıtyldy.