Salyqtan jaltarýdy bızneske aınaldyrǵan qaraǵandylyq sottaldy
ASTANA. QazAqparat - Qazaqstanda salyqtan jaltarý men jalǵan shot-faktýralardan kelgen zalal kólemi esepteldi, dep habarlaıdy QazAqparat QR Qarjy mınıstrligi Memlekettik kirister komıtetiniń baspasóz qyzmetine silteme jasap.
«Jalǵan shot-faktýralar men salyqtan jaltarý faktilerine qarsy kúres Memlekettik kirister komıteti Ekonomıkalyq tergeýler qyzmetiniń negizgi mindetteriniń biri. 2017 jyldyń 12 aıynda Ekonomıkalyq tergeýler qyzmetiniń óndirisinde qyzmet kórsetý, júk tasymaldaý jumystaryn is júzinde oryndamaı, shot-faktýralar berý faktileri boıynsha (Qazaqstan Respýblıkasy Qylmystyq kodeksiniń 216-baby) 568 qylmystyq is boldy. Kórsetilgen zalal 9 676 635 teńgeni qurady, onyń 6 080 842 teńgesi óteldi», - delingen habarlamada.
Óndiris barysynda 334 qylmystyq isti aıaqtady, onyń ishinde 288 is sotqa jiberilse, aqtalmaǵan negizdemeler boıynsha - 46 is toqtatyldy.
Sonymen birge, salyq tóleýden jaltarý faktileri boıynsha (Qazaqstan Respýblıkasy Qylmystyq kodeksiniń 245-baby) 785 qylmystyq is qozǵaldy. Keltirilgen zalal mólsheri 33 466 187 teńgeni qurady, onyń 11 912 813 teńgesi óteldi. Óndiris aıasynda 437 aıaqtaldy, onyń ishinde 348 is sotqa jiberilip, aqtalmaǵan negizdemeler boıynsha - 89 is toqtatyldy.
Máselen, Qaraǵandy oblysyndaǵy Memlekettik kirister deparatamentiniń Ekonomıkalyq tergeýler qyzmeti «A» esimdi azamatqa qatysty qylmystyq isti sotqa jiberdi.
«Sotqa deıingi tergeý barysynda «A-nyń» «T» JShS dırektory bola tura, kontragent kásiporyndy salyq salýdan bosatý úshin «V» esimdi azamatpen is júzinde jumystardy atqarmaı, qyzmet kórsetpeı, taýarlardy tasymaldamaı-aq, shot-faktýralardy resimdeý is-áreketterin jasaýǵa baǵyttalǵan qylmystyq kelisim jasasqan. Materıaldyq syıaqy retinde jalǵan mámilelerdiń jalpy somasynyń 3,5%-ti kólemine ýaǵdalasqan», - dep túsindirdi komıtet.
Atap aıtqanda, azamat «A» «K» JShS-in salyq tóleýden bosatý úshin óziniń «T» JShS-i atynan ótken jylǵy eseptik salyq kezeńi úshin «K» JShS-ine jalpy somasy 210 700 000 teńge bolatyn jalǵan býhgalterlik qujattar ázirlegen.
«Jalǵan shot-faktýralar úshin Azamat «A»«K» JShS-men mámile somasynyń 3,5%-i mólsherinde syıaqy alǵan, al «K» JShS býhgalterlik esebinde 189 031 114 teńgege taýar jetkizý týraly jalǵan málimetter keltirgen. Sot-saraptama qorytyndysyna sáıkes, bıýdjetke qosymsha tólenýi tıis salyq somasy 60 489 904 teńgeni qurady», - dep habarlady komıtet.
Qaraǵandy qalasynyń Qazybek bı aýdandyq soty azamat «A» kináli dep taýyp, 3 jyl 6 aıǵa bas bostandyǵynan shekteý túrinde jaza taǵaıyndady. Aıyptylardyń qylmystyq jolmen alynǵan múlkin tárkileýmen birge sot jaza óteýdiń barlyq merzimine probatsııalyq baqylaýdy bekitti.
