Salyqtan jaltarǵan úndistandyq kompanııalarǵa Qazaqstan zańy qoldanylady
Jalpy otyrysta mınıstr «1996 jylǵy 9 jeltoqsanda Nıý-Delıde jasalǵan Qazaqstan Respýblıkasynyń Úkimeti men Úndistan Respýblıkasynyń Úkimeti arasyndaǵy qosarlanǵan salyqty boldyrmaý jáne tabys pen kapıtalǵa salynatyn salyqtarǵa qatysty salyq salýdan jaltarýǵa jol bermeý týraly konventsııaǵa jáne hattamaǵa ózgerister men tolyqtyrýlar engizý týraly Qazaqstan Respýblıkasynyń Úkimeti men Úndistan Respýblıkasynyń Úkimeti arasyndaǵy hattamany ratıfıkatsııalaý týraly» QR Zańy jobasyn usynǵan bolatyn.
«Ratıfıkatsııalaý úshin sizderge usynylyp otyrǵan hattama birinshiden, aqparat almasýdy keńeıtý jolymen eki memlekettiń salyq qyzmetteriniń yntymaqtastyǵyn damytýǵa múmkindik beredi. Ekinshiden, salyqtan jaltarýlar men Konventsııa erejelerin teris paıdalanýlar bolǵan kezde ishki zańnamany qoldanýǵa múmkindik jasaıdy. Úshinshiden, salyq organdarynyń salyqtyq bereshekterdi óndirip alý boıynsha salyq qyzmetteriniń yntymaqtastyǵyn keńeıtý jolymen salyqtan jaltarýdy boldyrmaýǵa múmkindik beredi», - dedi mınıstr.
Sonymen qatar mınıstrdiń aıtýynsha, hattamada «Qazaqstan» termınine ózgerister engizildi, qazaqstandyq salyqtardyń ataýlary jańartyldy, ýaǵdalasýshy memleketterdegi rezıdenttikti anyqtaýdy retteıtin baptyń erejeleri naqtylandy. Negizgi ózgerister Qazaqstan Respýblıkasynyń aýmaǵynda beırezıdenttiń tabıǵı resýrstardy barlaý jáne qyzmetter kórsetýi kezinde turaqty mekeme qurý tártibine qatysty.
«Atap aıtqanda, hattamamen tabıǵı resýrstardy barlaý nemese osyndaı jumystardyń oryndaýyn baqylaýǵa baılanysty qyzmetterdi kórsetý kezinde beırezıdenttiń tabystaryna salyq salý tártipterin naqtylaıtyn ózgerister engizildi. Salyq salý máselelerinde osy Hattamanyń eki memleket arasyndaǵy zańnamalyq baza retindegi rólin atap ótkim keledi», - dedi ol.
Sultanovtyń aıtýynsha, Qazaqstan men Úndistan arasynda taýar aınalymy sońǵy 10 jylda 5 mlrd AQSh dollaryn qurady. Bul 2016 jyly 618,4 mln AQSh dollary bolǵan edi. Qazaqstandyq eksporttyń negizgi bóligi ýran men shıki munaı ónimderi bolyp tabylady. Al ımport qurylymynda qara shaı, dárilik zattar basymdyqqa ıe.
