Salyqqa raqymshylyq: Jeke azamattardyń 1,9 mlrd teńge ósimpuly esepten shyǵaryldy

NUR-SULTAN. QazAqparat – Qazaqstanda 400 myńnan astam adamǵa eseptelgen 1,9 mlrd teńge somasyndaǵy salyqtyń ósimpuly joıyldy. Bul týraly Memlekettik kirister komıteti tóraǵasynyń orynbasary Jaıdar Іńkárbaev málim etti, dep habarlaıdy QazAqparat tilshisi.

Aıta keteıik, bıylǵy tamyz aıynan jeke tulǵalarǵa arnalǵan salyqqa raqymshylyq bastaldy.

Onyń aıasynda azamattar ótken jyldar úshin salyq mindettemeleri boıynsha negizgi qaryz somasyn tólegen jaǵdaıda olarǵa ósimpuldar shegeriletin bolady.

«Osyǵan oraı ótken salyq kezeńderi úshin jınalǵan qaryzdary bar jeke tulǵalar bıyldyń sońyna deıin negizgi qaryzdy ótep, salyqqa raqymshylyqty paıdalana alady. Bul turǵyda eseptegen ósimpuldar memlekettik kirister organdary tarapynan avtomatty túrde esepten shyǵarylady. Qazirgi ýaqytta 9,5 mlrd teńgeni tólegen 400 myńnan astam azamatqa 1,9 mlrd teńge ósimpul esepten shegertildi», - dedi Jaıdar Іńkárbaev.

Atap aıtqanda, salyqqa raqymshylyq jyl sońyna deıin jalǵasady.

«Salyq tóleýshilerdi atalǵan múmkindikti belsendi paıdalanýǵa shaqyramyz. Bul óz kezeginde salyqtyq aýyrtpashylyqty tómendetýge ári ósimpuldar men aıyppuldardy esepten shaǵarýǵa múmkindik beredi», - dedi ol.

Budan buryn habarlanǵandaı, búginde 41 820 bıznes sýbekti 12,5 mlrd teńgeni tólep, salyqqa raqymshylyqty paıdalandy.