Salyq zańnamasy negizinen sán-saltanaty artqan asa aýqatty adamdar tobyna baǵyttalyp otyr - Q. Sultanov
ASTANA. 9 qazan. QazAqparat - Salyq zańnamasy negizinen sán-saltanaty artqan asa aýqatty adamdar tobyna baǵyttalyp otyr.
Búgin Parlament Májilisinde «QR keıbir zańnamalyq aktilerine salyq salý máseleleri boıynsha ózgerister men tolyqtyrýlar engizý týraly» zań jobasyn talqylaý barysynda depýtat Qýanysh Sultanov osylaı málimdedi.
Depýtattyń aıtýynsha, salyq máselesin qarastyratyn zań jobasy naqty kórsetkishterge arnalyp otyr. «Onyń ishinde baılyǵy artqan, qoǵamda múmkindigi asyp turǵan qaýymǵa baǵyttalǵan zań jobasy deýge bolady. Qarapaıym jurttyń qolyndaǵy kólikterge, barlyq sanattaǵy turǵyn úılerge qatysty salyq máselesine fraktsııa óz usynystaryn jasap, Úkimetten qoldaý tapty. Óıtkeni, bul zań ásirese sán-saltanaty artqan, asa baı adamdar tobyn qamtyp otyr. Sonymen qatar, zań jobasynda halqymyzdyń edáýir bóligin qurap otyrǵan orta tapty, orta býyndy qoldaý keń qamtylǵan», - deıdi Q. Sultanov.
Onyń aıtýynsha, turǵyn jaılarǵa salyqtyń ósýi negizinen orta býyndaǵy topty emes, dáýleti men sáýleti artqan, óte qymbat qurylys materıaldarynan salynǵan saraılarǵa qatysty ústeme salyq negizinde bolyp tabylady. Avtókólikter salyǵy da osy baǵytta. Atap aıtqanda, júrýge jaraıtyn kólikterimen kúnin kórip júrgen azamattarǵa bul zańnyń eshqandaı qatysy bolmaıdy. Al qymbat kólikter alǵan adamdar da salyqty negizinen 2014 jyldyń 1 qańtarynan bastap qana tóleı bastaıdy. Túıindeı aıtqanda, salyqtaǵy ózgerister eldiń edáýir bóligin quraıtyn orta býynǵa, áleýmettik toptyń múddelerine salmaq salmaıdy.
«Al temeki men alkogolge salynatyn salyqty halyq densaýlyǵy, qoǵam salaýattylyǵy turǵysynan qarap, sanaly túrde arttyra túsýge tıispiz», - deıdi depýtat Qýanysh Sultanuly.
