Salyq túsimderiniń turaqtylyǵy nyǵaıdy – Qarjy mınıstrligi
Bul týraly Parlament Májilisinde «2020-2022 jyldarǵa arnalǵan respýblıkalyq bıýdjet týraly» zań jobasyn tanystyrý barysynda QR birinshi qarjy vıtse-mınıstri Berik Sholpanqulov málim etti, dep habarlaıdy QazAqparat tilshisi.
«Respýblıkalyq bıýdjetti josparlaý negizine salynǵan bazalyq makroekonomıkalyq stsenarıı JІÓ-niń údemeli ósýin, ınflıatsııanyń ortasha jyldyq dáliziniń 2022 jyly 3-5 paıyzǵa deıin tómendeýin qamtamasyz etedi. 2020 jylǵa arnalǵan bıýdjet tapshylyǵy 2022 jyly 1 paıyzǵa deıin tómendetilip, JІÓ-niń 2,1 paıyzy deńgeıinde josparlandy», - B. Sholpanqulov.
Onyń sózine qaraǵanda, jańa áleýmettik bastamalardy iske asyrýdy jáne óńirlerdi damytýdy jalǵastyra otyryp, kepildik berilgen transfert 2020-2021 jyldary 1,1 trln teńgege ulǵaıtyldy. 2022 jyldan bastap ol kezeń-kezeńmen 2 trln teńgege tómendeıtin bolady. Zań jobasynda ol 2020-2021 jyldary 2,7 trln teńge jáne 2022 jyly 2,6 trln teńge somasynda kózdelgen.
«Munaıly emes túsimder kóleminiń ulǵaıýy salyq túsimderi turaqtylyǵynyń nyǵaıǵanyn kórsetip otyr. Ekonomıkanyń damý qarqynynyń artýy, kedendik jáne salyqtyq ákimshilendirýdiń jaqsarýy jáne olardy tsıfrlandyrý ózgeristerdiń negizgi faktorlary boldy. Osy baǵyttaǵy jumys salyqtyq jáne kedendik aqparattyq júıeler keshenin biriktirý jolymen jalǵasýda. Bul rette shaǵyn jáne orta bıznesten túsetin korporatıvtik tabys salyǵynyń túsimderi jergilikti bıýdjetter bazasyna berildi», - dedi birinshi vıtse-mınıstr.
Berik Sholpanqulovtyń aıtýynsha, tutastaı alǵanda, respýblıkalyq bıýdjettiń kiristeri (transfertterdi esepke almaǵanda) úsh jyldyq kezeńde: 2020 jyly - 8,0 trln teńge nemese JІÓ-ge 10,7%; 2021 jyly - 8,6 trln teńge nemese JІÓ-ge 10,6%; 2022 jyly - 9,4 trln. teńge nemese JІÓ-ge 10,6% quraıdy.
