Salyq tóleýshilerge aralas model usynylady - Qarjy mınıstri
«Shaǵyn jáne orta bıznes sýbektileri úshin talap qoıýdyń merzimin 5 jyldan 3 jylǵa deıin qysqartý usynylady, onyń ishinde buryn tólengen salyq somalary qaıta qaralýy jáne qosymsha eseptelýi múmkin. Salyqtyq tártipti yntalandyra túsý úshin táýekelderdi basqarý júıesi túbegeıli qaıta qaralyp jatyr. Ártúrli sanattaǵy salyq tóleýshiler úshin salyqtyq ákimshilendirýde saralanǵan tásil engiziledi», - deıdi Qarjy mınıstri.
Onyń aıtýynsha, «jasyl top» dep atalatyn birinshi sanatqa táýekel deńgeıi tómen salyq tóleýshiler jatady. Olar tekserilmeıdi. Eseptilikti usyný, bereshekti óteý, kóldeneń monıtorıngke qatysý múmkindigi merzimderin ózgertý túrinde jeńildikterdi engizý kózdelgen.
«Táýekel deńgeıi ortasha topqa ákimshilendirýdiń qalypty tetikteri qoldanylatyn habarlamalar jiberiledi. Talap oryndalmaǵan jaǵdaıda salyqtyq baqylaý sharalary qoldanylatyn bolady. Úshinshi nemese «qyzyl aımaq» dep atalatyn topqa táýekel deńgeıi joǵary salyq tóleýshiler enedi. Qarapaıym tilmen aıtqanda, bular zańdy belinen basqan salyq tóleýshiler. Salyq mindettemelerin oryndamaǵan jaǵdaıda olarǵa memlekettik kirister organdary birden nazar aýdaryp, qatań sharalar qoldanatyn bolady», - dep atap ótti Baqyt Sultanov.
Onyń aıtýynsha, álemniń kóptegen elderinde salyq tóleýshilerdi sanattarǵa bólý jasyryn, ıaǵnı «jabyq» túrde júrgiziletin kórinedi.
«Biz salyq tóleýshilerge táýekel deńgeıi tómen «jasyl aımaqqa» ený úshin baǵdar bolatyn «ashyq krıterıılerdi» kózdeıtin jáne «qyzyl aımaqqa» túsip ketýdi eskertetin aralas modeldi engizýdi usynamyz. Ózderińizge belgili bolǵandaı kóptegen kásipkerler úshin kompanııany jabý ony ashýǵa qaraǵanda áldeqaıda kúrdeli. Bul jaǵdaı jumys istemeıtin salyq tóleýshilerdiń kóbeıip ketýine ákep soqtyrdy. Osyǵan baılanysty zań jobasynda olardy májbúrli túrde taratý úshin negizgi sharttar berilgen», - dep túıdi mınıstr.
