Salyq tóleýshiler kótergen kókeıkesti máselelerdi nazardan qaldyrmaımyz - Salyq komıtetiniń tóraǵasy

ASTANA. QazAqparat - Keden odaǵy elderi aıasynda qazaqstandyq bıznes ókilderi taýarlarynyń sapasyna aıryqsha mán berýi mańyzdy. Bul týraly búgin Ortalyq kommýnıkatsııalyq qyzmetindegi brıfıngte QR Qarjy mınıstrligi Salyq komıtetiniń tóraǵasy Ánýar Jumadildaev málim etti.

«Keden odaǵy aıasynda jumys istep jatqan salyq tóleýshilerge, kásipkerlerge turaqty túrde túsindirý jıyndary ótkizilip turady. Biz kókeıkesti máseleler boıynsha saýaldarǵa jaýap berýge tyrysamyz. Mundaı semınarlar tek Astanada ǵana emes, sonymen qatar barlyq óńirlerde ótedi. Al kúrdeli suraqtar týyndasa nemes úsh eldiń kelisimi qajet bolǵan jaǵdaıdy, onda konsýltatıvtik salyqtyq komıssııanyń qaraýyna shyǵaramyz. Osy jerde úsh eldiń sarapshylary birigip, tıisti sheshim shyǵarady», - dedi komıtet basshysy.

«Elimizdiń bıznes ókilderi 170 mıllıondyq naryqqa shyǵyp otyr jáne osynyń ózi óndirilgen taýalardy ótkizýge úlken múmkindik jasaıdy. Biraq, eki elde (KO elderi) bizdiń kásipkerlerdi qushaǵyn jaıyp kútip tur degendi bildirmeıdi, bul turǵyda elimizdiń bıznes ókilderi báskelestikke qaýqarly bolyp, taýardyń sapasyn kóterip, osy aýqymdy naryqty ıgerýi mańyzdy», - dep túıdi Á. Jumadildaev.