Salyq tóleýden jaltarǵan kásiporyndar 564 mln. teńge aıyppul tóledi - Almaty
ALMATY. QazAqparat- Almatyda salyq organdarynyń habarlamalaryn oryndaýdan bas tartqan kásiporyndar memleketke 564 mln. teńge aıyppul sharalaryn tóleýge májbúr boldy.
Bul týraly búgin Almaty qalasy boıynsha salyq departamentiniń baspasóz qyzmeti habarlady.
Ústimizdegi jyldyń basynan beri júrgizilgen tekserý qorytyndysy boıynsha, jer qoınaýyn paıdalanýshy 70 kásiporyn kórsetilgen merzim ishinde qatelikterin túzep, qala bıýdjetine aıyppulsyz 200 mln. teńge salyq tólegen.
Biraq, jaltarǵan 3 kompanııa osyndaı «nemquraılyqtary» úshin eseptelgen salyqtar men aıyppuldardy qosqanda bıýdjetke jalpy somasy 564 mln. teńge tóleýge májbúr boldy.
Bul kompanııalar ózderiniń eseptemelerinde óndirilgen paıdaly qazbalardyń kólemin ádeıi kemitken. Sondaı-aq olardyń eksportqa shyǵarylǵan kólemi de azaıtylyp kórsetilgen.
Osy atalǵan kásiporyndar boıynsha materıaldar qazir quqyq qorǵaý organdaryna jiberiledi. Olarda protsessýaldyq sheshimder qabyldanatyn bolady.
Jalpy, salyq tóleýshilerdi kameraldy tekserý barysynda ár túrli zań buzýshylyqtar tirkeletindigi belgili. Mundaı jaǵdaıda salyq tóleýshige jiberilgen qatelikterdi 30 kún ishinde túzetý tapsyrylady. Ol úshin arnaıy habarlamalar jiberiledi. Osy merzim ishinde salyq tóleýshige aıyppul salynbaıdy.
Al eger salyq organdarynyń habarlamalaryn eleń qylmasa, mundaı salyq tóleýshiler ósimaqymen qatar, ákimshilik aıyppul da tóleıdi. Oǵan qosa, olarǵa salyq organdary tarapynan josparsyz tekserýler júrgiziletin bolady.
Bul jerde bir aıta ketetin jáıt, qatelikterdi túzeý jóninde habarlama alatyn salyq tóleýshilerdiń ishinde jaýapkershilikten ádeıi qashatyndar da bar. Olar tirkeý qujattaryn qoldan jasaıdy, seriktesteriniń aty-jónderin ózgertedi nemese salyqtyń merzimin aýystyryp jiberedi.
Bolashaqta mundaı qasaqana jasalatyn áreketterge qarsy qoldanylatyn sharalar kúsheıtilmek.
