Salyq salý máselelerine arnalǵan zań qabyldandy
ASTANA. 21 qarasha. QazAqparat - Búgin Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine salyq salý máseleleri boıynsha ózgerister men tolyqtyrýlar engizý týraly» QR Zańy qabyldandy.
Parlament qabyldaǵan qujat Memleket basshysynyń qol qoıýyna joldanady.
Atalǵan zań jańa bıýdjet saıasaty tujyrymdamasyn jáne Salyq salý máseleleri jónindegi konsýltatsııalyq keńestiń sheshimderin iske asyrý maqsatynda ázirlengen.
Atap aıtqanda, salyq júıesiniń ekonomıkalyq qaıtarymdylyǵyn arttyrý úshin zań arqyly jeke tulǵalar múlki, jer kólik quraldary salyqtarynyń mólsherlemelerin arttyrý boıynsha normalar qamtylady. Halyqtyń áleýmettik zııandy taýarlardy tutyný yntasyn tómendetý maqsatynda temeki jáne alkogol ónimderine aktsızderdi kezeń-kezeńimen kóterý kózdelgen. Qujatta ekonomıkanyń jekelegen salalaryn qoldaý jónindegi shaǵyn kásipkerlik sýbektilerine, aýyl sharýashylyǵy taýarlaryn óndirýshilerine salyq salýdy ońtaılandyrýǵa baǵyttalǵan normalar da qarastyrylǵan. Máselen, joǵary tehnologııalyq ónim óndirisin damytý úshin jekelegen arnaıy ekonomıkalyq aımaqtarda júzege asyrylatyn qyzmetterdiń basym túrleriniń tizbesi keńeıtiledi.
Jalpy alǵanda qabyldanǵan zańǵa sáıkes, 2014 jyldyń 31 jeltoqsanynan keıin shyǵarylǵan (jasalǵan nemese qurastyrylǵan) nemese QR aýmaǵyna ákelingen qozǵaltqyshynyń kólemi 3 myń tekshe santımetrden joǵary jeńil avtomobılder úshin kólik quraldaryna salyqty arttyrý qarastyrylady. Astana jáne Almaty qalalarynda, sonymen qatar oblys ortalyqtarynda turǵyn úıdiń bazalyq qunyn eki ese arttyrý kózdeledi. Al kúshti alkogol jáne temeki ónimine aktsızder mólsherlemelerin 2014 jyl men 2016 jyl aralyǵynda kezeń-kezeńmen arttyrý qarastyrylady. Bul rette alkogol ónimderi boıynsha stavkany arttyrý tek kúshti alkogol ishimdikterine qatysty bolady. Alkogoli az ónimder mólsherlemesin keler jyly qaraý josparlanyp otyr. Salyq salý máseleleri jónindegi konsýltatsııalyq keńes sheshimderine sáıkes salyq zańnamasyn qoldanýǵa baılanysty máselelerdi retteý jónindegi normalar kózdelgen. Buǵan qosa, zań jobasynda salyqtyq ákimshilik etý, túsiniksizdikter men dálsizdikterdi joıý máselelerin jetildirýge baǵyttalǵan normalar qarastyrylǵan.
