Salyq salý máselelerin retteýdi kózdeıtin zań jobasy birinshi oqylymda maquldandy - Májilis
ASTANA. Qazannyń 20-sy. QazAqparat - Búgin QR Parlamenti Májilisiniń Tóraǵasy Oral Muhamedjanovtyń jetekshiligimen ótken osy Palatanyń jalpy otyrysynda «Qazaqstan Respýblıkasynyń keıbir zańnamalyq aktilerine salyq salý máseleleri boıynsha ózgerister men tolyqtyrýlar engizý týraly» zań jobasy birinshi oqylymda talqyǵa tústi.
Bul zań jobasy boıynsha Qarjy mınıstri Bolat Jámishev baıandama jasady.
Zań jobasy memlekettiń qarjylyq qajettilikterin qamtamasyz etý, halyqaralyq salyq salý júıesin jetildirý jáne halyqaralyq tájirıbege sáıkes salyq salý máseleleri jónindegi halyqaralyq sharttardy ákimshilendirý, sondaı-aq salyq zańnamasynyń jekelegen normalaryn naqtylaý maqsatynda ázirlengen.
Zań jobasyn ázirleýshilerdiń málimetine súıensek, osy sharany iske asyrý maqsatynda «Salyq jáne bıýdjetke tólenetin basqa da mindetti tólemder týraly» Qazaqstan Respýblıkasynyń Kodeksin (Salyq kodeksi) qoldanysqa engizý týraly» Qazaqstan Respýblıkasynyń 2008 jylǵy 10 jeltoqsandaǵy Zańyna tıisti ózgerister engizildi, óıtkeni osy Zańda belgilengen paıdaly qazbalardy óndirýge salynatyn salyq stavkalary jer qoınaýyn paıdalanýshylar úshin korporatıvtik tabys salyǵynyń stavkalaryn kezeń-kezeńimen tómendetýden bolatyn bıýdjet shyǵyndaryn boljamdaǵan.
Budan basqa, jeke tulǵalardyń tabystaryna salyq salýdyń progressıvtik shákilin belgileý maqsatynda jeke tulǵalardyń tabysyna salynatyn salyq stavkalaryn ózgertý kózdelip otyr. Bul rette progressıvtik shákil engizilip otyr, munda úlken tabystarǵa salyq neǵurlym joǵary stavkalarmen salynady jáne jeke tabys salyǵynyń eń joǵary stavkasy korporatıvtik tabys salyǵynyń 20 paıyzǵa teń stavkasymen teńesedi.
Halyqaralyq salyq salý júıesin jetildirý maqsatynda zań jobasynda salyq salý maqsatynda rezıdent emestiń turaqty mekemesin qurý ólshemderi naqtylanady jáne rezıdent emestiń turaqty mekemesin tirkeý tártibi reglamentteledi. Óıtkeni Kodekstiń qoldanystaǵy redaktsııasy anyqtyq prıntsıpine tolyǵymen sáıkes kele bermeıdi jáne ártúrli maǵynada túsinýge ákep soqtyrady.
Jalpy otyrysta Májilistiń Qarjy jáne bıýdjet múshesi Amanjan Jamalov qosymsha túsinik berdi. Talqylaýdan keıin zań jobasy birinshi oqylymda maquldandy.
