Salyq salasyna blokcheın qalaı engiziledi

ASTANA. QazAqparat - QR Qarjy mınıstri Baqyt Sultanovtyń aıtýynsha, salyq salasyndaǵy blokcheın tehnologııalary arqasynda qosarlanǵan qun salyǵyn birden qaıtarýǵa bolady, dep habarlaıdy QazAqparat tilshisi.

«Búginde blokcheın zamanýı trendke aınaldy. Osy oraıda biz Eýropa elderiniń salyq salasyndaǵy mamandarymen kezdesip, tájirıbe almastyq. Olarda ádistemelik baza bar. Biraq bir-birimen kelise almaı jatyr. Biz bolsaq, Eýrazııalyq ekonomıkalyq odaq aıasynda osy bastamany jyldam iske asyra alamyz. Negizi, osy ýaqytqa deıin birqatar jumystar atqaryldy», - dedi Baqyt Turlyhanuly Úkimettiń búgingi otyrysynda.

Onyń aıtýynsha, osy aıda mınıstrlik IBM kompanııasymen birlesip, arnaıy zerthanany ashýdy kózdeıdi. Sonyń negizinde blokcheın tehnologııalaryn engizý sharalary atqarylady. «Kelesi jyly tamyz aıyna deıin biz jańa júıeniń prototıpin jasap shyǵarýdy josparlap otyrmyz. Qazirgi kezde ádisteme daıyn. Blokcheındi qoldanýǵa qatysty tehnologııalyq sharttar da daıar», - dep atap kórsetti mınıstr.

Aıta keteıik, Úkimettiń búgingi otyrysynda salyq jáne keden sharalaryn avtomattandyrý máselesi qaraldy . QR Premer-Mınıstri Baqytjan Saǵyntaevtyń aıtýynsha, búginde aqparattyq tehnologııalardy engizý sharalary baıaý atqarylady. Sebebi bireýler úshin bıýrokratııanyń bolǵany tıimdi .  Bızneske jeńildik jasaımyz dep, biraz ýaqytty da ótkizip aldyq.